पूर्वउपप्रधानमन्त्री बद्रीप्रसाद मण्डलको निधन

विराटनगर । पूर्वउपप्रधानमन्त्री एवं नेपाल सद्भावना पार्टीका पूर्वकार्यवाहक अध्यक्ष बद्रीप्रसाद मण्डलको ८८ वर्षको उमेरमा निधन भएको छ । विराटनगर महानगरपालिका–९ स्थित निजी निवासमा मंगलबार उनको निधन भएको हो ।

मधेसको राजनीति र राजसंस्थासँगको निकट सम्बन्धका कारण उनी नेपाली राजनीतिमा एक चतुर र प्रभावशाली पात्रका रूपमा चिनिन्थे ।

स्वर्गीय मण्डलले तत्कालीन राजा वीरेन्द्र र ज्ञानेन्द्र दुवैको विश्वास पात्र बनेर पटक–पटक राजकीय जिम्मेवारी सम्हालेका थिए । मोरङ जिल्ला सभापति रहेकै बेला उनी तत्कालीन राजपरिवारसँग नजिकिएका थिए र पहिलो पटक अर्थ सहायक मन्त्री बनेका थिए । त्यसपछि २०४३ सालमा उनले कानुन तथा न्याय मन्त्रीको जिम्मेवारी पाएका थिए ।

२०६१ सालमा तत्कालीन राजा ज्ञानेन्द्र शाहले सत्ता हातमा लिएपछि गठित मन्त्रिपरिषद्मा मण्डल तेस्रो वरियतासहित कृषि मन्त्री बनेका थिए । उनले उपप्रधानमन्त्रीको जिम्मेवारी समेत सफलतापूर्वक निर्वाह गरेका थिए ।

मण्डलको राजनीतिक जीवनको एक महत्त्वपूर्ण मोड २०५६ सालको निर्वाचनलाई मानिन्छ । तत्कालीन मोरङ क्षेत्र नम्बर ५ बाट उनले नेपाली कांग्रेसकी प्रभावशाली नेतृ एवं पूर्वउपप्रधानमन्त्री शैलजा आचार्यलाई पराजित गर्दै सबैलाई अचम्मित पारेका थिए ।

गजेन्द्रनारायण सिंहले स्थापना गरेको नेपाल सद्भावना पार्टीमा आबद्ध भएर उनले लामो समय मधेसको राजनीतिलाई नेतृत्व दिएका थिए । देशमा गणतन्त्र स्थापना भएपछि केही समय राजनीतिक रूपमा निष्क्रिय रहे पनि उनी पुनः सद्भावना पार्टीको राजनीतिमा सक्रिय भएका थिए ।

मण्डललाई नजिकबाट चिन्नेहरू उनलाई एक सक्रिय र जनस्तरमा भिजेका नेताका रूपमा स्मरण गर्छन् । जनता समाजवादी पार्टी (जसपा) का नेता जयराम यादव भन्छन्, “उहाँ मोरङको राजनीतिमा धेरै पुरानो र सक्रिय नेता हुनुहुन्थ्यो । मेरो बुबाको वि.सं. २०३२–३३ सालमा बनेको नागरिकतामा उहाँकै हस्ताक्षर छ । पञ्चायतकालदेखि नै उहाँको प्रभाव निकै लोभलाग्दो थियो ।”

स्वर्गीय मण्डलका दुई श्रीमती, तीन छोरा र तीन छोरी छन् । उनका चार छोरामध्ये एकको केही समयअघि नै निधन भइसकेको छ ।