पश्चिमी वायुकाे प्रभाव : देशभर चिसाे बढ्याे

काठमाडौं । देशका धेरै भागमा आज पनि मौसम बदली हुनेछ । राम्रोसँग घाम नलाग्दा चिसो बढ्ने जल तथा मौसम विज्ञान विभागले जनाएको छ ।

मौसमविद् गोविन्द झाका अनुसार आज बिहान तराईका अधिकांश भूभागमा बाक्लो हुस्सु र कुहिरो लागेको छ तराईसँगै पहाडी उपत्यकामा पनि हुस्सु र कुहिरो लागिरहेको छ ।

हुस्सु र कुहिरो लागेसँगै तीन दिनबाट चिसोको महसुस भएको छ । यसको कारण पश्चिमी वायु भएको मौसमविद् झा बताउँछन् । “५५ सय ६ हजार मिटरमथि उपल्लो वायुमण्डलमा बनेको न्यूनचापीय प्रणालीका कारण चिसो भएको हो,” उनी भन्छन्, “शक्तिशाली न्यूनचापीय प्रणाली नभए पनि न्यूनचापीय प्रणाली बनेको छ । न्यूनचापीय प्रणालीका कारण आएको चिसो हावाका कारण चिसो भएको हो ।”

चिसाे हिजो भन्दा आज कम हुने र आजभन्दा भोलि कम हुने उनको भनाइ छ । न्यूनचापीय प्रणालीका कारण चिसो हावा आए पनि पानी पार्ने क्षमता भएको जलवाष्प हावा भने नरहेको उनी बताउँछन् ।

जलवायुविज्ञ धर्मराज उप्रेती पश्चिमी वायुको प्रभावले चिसो बढेको बताउँछन् । “पश्चिमी वायुको प्रभावले चिसो बढ्नेछ । बादल र हुस्सु थप देखिने सम्भावना छ,” जलवायुविज्ञ उप्रेती भन्छन्, “उच्च हिमाली क्षेत्रमा हिमपातको सम्भावना रहेको छ ।” उनले चिसो हावा बढ्ने सम्भावना रहेको बताएका छन् ।