एमाले महाधिवेशन : नजिकका नेताले छाडे ओलीको साथ

काठमाडौं । एमालेको ११औं महाधिवेशनमा केपी शर्मा ओली निकटका नेताहरुले उनको साथ छाडेका छन् । नयाँ नेतृत्वका लागि मनोनयन गर्दा पदाधिकारीमा आफ्नो नाम नसमेटेपछि निकटका नेताहरुले उनको साथ छाडेका हुन् ।

नयाँ नेतृत्वका लागि केपी शर्मा ओली र इश्वर पोखरेलले छुट्टै प्यानल बनाएर प्रतिस्पर्धा गरिरहेका छन् । भाेलि मतदान गर्ने कार्यसूची छ ।

महाधिवेशनमा उपाध्यक्षमा ओलीले अघि सारेका प्रदीप ज्ञवालीले केन्द्रीय सदस्यमा उम्मेदवारी दिए । उनी महासचिव पदका आकांक्षी थिए । तर, ओलीले महासचिवमा शंकर पोखरेललाई नै अघि सारे । त्यसपछि ज्ञवाली रिसाएका छन् ।

ओलीका विश्वासपात्र मानिएका नेताहरु अग्नि खरेल,रघुजी पन्त, लालबाबु पण्डित, राजेन्द्र गौतम र भीमप्रसाद आचार्यले पनि उनको साथ छाडेका छन् । गोकुल बाँस्कोटा र कृष्णगोपाल श्रेष्ठले पनि उनको साथ छाडेका छन् । बाँस्कोटा र श्रेष्ठ ईश्वर पोखरेल प्यानलबाट सचिव पदमा उम्मेदवार छन् ।

पन्तले ओलीको निर्देशन अवज्ञा गर्दै उपाध्यक्षमा उम्मेदवारी दिएका छन् । पार्टीको प्रचार विभाग प्रमुख राजेन्द्र गौत्तमले उपमहासचिव पदमा उम्मेदवारी दिएका छन् । अग्नि खरेलले सचिव पदमा उम्मेदवारी दिएका छन् । लालबाबु पण्डितले सचिव पदमा उम्मेदवारी दिएका छन् । ओली प्यानलमा नपरेपछि भीम आचार्यले पनि उपाध्यक्षमा उम्मेदवारी दिएका छन् ।