सुजाता कोइरालाले युवालाई क्षेत्र छाडिन, क्षेत्रले पुरानै नेताको नाम पठायो

विराटनगर । वि.स. २०७९ सालको निर्वाचनमा नेपाली कांग्रेसबाट मोरङ क्षेत्र नक्बर २ मा उम्मेदवार बनेकी नेतृ सुजाता कोइराला एमाले उम्मेदवार ऋषिकेश पोखरेलसँग पराजित भइन् ।

जेनजी आन्दोलनपछि बनेको नयाँ सरकारले फागुन २१ गतेका लागि निर्वाचन घोषणा गरेको छ । गिरिजाप्रसाद कोइरालाकी छोरी सुजाताले यो निर्वाचनमा प्रत्यक्ष तर्फ उम्मेदवार बन्न चाहिनन् । उनले युवाका लागि भन्दै ठाउँ छाडिन् । तर, क्षेत्रीय समितिले पुरानै नेताको नाम सिफारिस गरेपछि उनले असन्तुष्टि जनाएकी छन् ।

क्षेत्रिय समितिले उनको नाम समानुपातिक सूचीमा राखेर पठाएको छ । प्रत्यक्ष तर्फ डाक्टर मीनेन्द्र रिजाल, कोशी प्रदेशसभाका पूर्वसांसद शिवनारायण सिंह र महिला तर्फ नारायणी पण्डितको नाम सिफारिस भएको छ । रिजाल २०७४ सालमा सो क्षेत्रबाट निर्वाचित भएका थिए ।

‘‘मैले चुनाव नलड्ने घोषणा गरेँ, मेरो ठाउँमा कोही युवाहरू आऊन् भन्ने सोच थियो, तर दुर्भाग्यवश, त्यहाँ युवाहरू आएनन् र पुरानै अनुहार सिफारिस गरियो,कोइरालाले भनेकी छन्,’यो एकदमै दुःखलाग्दो कुरा हो ।’’

सुजाताको क्षेत्रमा मात्र होइन, मोरङका ६ वटै निर्वाचन क्षेत्रमा युवा अनुहार प्राथमिकतामा पर्न सकेका छैनन्। अधिकांश क्षेत्रबाट ‘हेभीवेट’ र पुरानै नेताहरूको नाम सिफारिस भएको छ ।

काे काे भए सिफारिस ?

क्षेत्र नं. १: प्रत्यक्षतर्फ पूर्वमन्त्री डिकबहादुर लिम्बू (२०७९ का विजेता), प्रदेश सहमहामन्त्री खड्ग फागो र दिव्या बस्नेत। समानुपातिकमा सीता कार्की र इन्दुदेवी चौधरी ।

क्षेत्र नं. ३: प्रत्यक्षतर्फ मेडिकल व्यवसायी डा. सुनिल शर्माको एकल नाम सिफारिस (२०७९ का विजेता)। समानुपातिकमा पूर्व प्रदेश सांसद सुयर्माराज राईसहित बसन्त भट्टराई, अताबुल मन्सुर ।

क्षेत्र नं. ४: प्रत्यक्षतर्फ पूर्वमन्त्री महेश आचार्य, दिलिपकुमार गच्छदार, गुरुराज घिमिरे, विनोद बस्नेत र दुर्गा कोइराला ।

क्षेत्र नं. ५: प्रत्यक्षतर्फ हसन अन्सारी, राजेश गुप्ता, फुलकुमार लालवानी, फैयाज अहमद र निर्मला सुवेदी ।

क्षेत्र नं. ६: डा. शेखर कोइरालाको एकल नाम सिफारिस (२०७९ का विजेता) ।

सभापति भन्छन्– ‘युवा तयार भएनन्’

नेपाली कांग्रेस मोरङका सभापति डिकबहादुर लिम्बू भने युवाहरूलाई पाखा लगाइएको स्वीकार्न तयार छैनन् । उनले युवाहरू नै नेतृत्वका लागि तयार नभएको दाबी गरे। ‘‘हामीले जबर्जस्ती उभ्याउने कुरा भएन, चुनाव लड्नका लागि युवाहरू अझै पूर्ण रूपमा तयार भइसकेका छैनन्,’’ सभापति लिम्बूले भने, ‘‘अलि परिपक्व र कार्यकर्ताले विश्वास गरेका साथीहरू नै सिफारिस भएर आउनुभएको छ ।’’

उनले बिस्तारै वातावरण बन्दै जाने बताउँदै थपे, ‘‘यस्तै दबाब रह्यो भने अर्को पटक धेरै युवाहरू आउँछन्। अर्को पटकसम्म धेरै नेताहरूले अवकाश लिनुहुन्छ, म पनि लिन्छु, अनि युवाहरूका लागि बाटो खुल्छ।’’