कोशी प्रदेशमा धान उत्पादन घट्यो

विराटनगर । यो वर्ष कोशी प्रदेशमा धान उत्पादन घटेको छ। प्रदेश कृषि निर्देशनालय विराटनगरका अनुसार गत वर्षको तुलनामा करिब २० हजार मेट्रिक टन धान उत्पादन घटेको हो ।

निर्देशनालयका अनुसार गत वर्ष प्रदेशभर ११ लाख २२ हजार २२१ मेट्रिक टन धान उत्पादन भएको थियो । यो वर्ष ११ लाख २ हजार ९४९ मेट्रिक टन मात्रै उत्पादन भएको छ ।

कृषि विज्ञहरूका अनुसार रोपाइँका बेला खडेरी पर्नु र काट्ने बेलामा अत्याधिक वर्षा हुनु उत्पादनमा आएको गिरावटको मुख्य कारण हो । कीराको प्रकोप र केही क्षेत्रमा धानबाली छोडेर देखिएको वैकल्पिक रोजाइले पनि उत्पादकत्वमा असर पारेको छ ।

उत्पादनसँगै खेती गरिने क्षेत्रफल पनि थोरै घटेको निर्देशनालयले जनाएको छ । गत वर्ष २ लाख ७५ हजार २ सय ६८ हेक्टर क्षेत्रमा धान खेती भएकोमा यो वर्ष २ लाख ६९ हजार ६ सय ८४ हेक्टरमा मात्र खेती भएको थियो ।

कृषि कार्यालयहरूका अनुसार धान उत्पादनको राजधानी मानिने मोरङ, झापा र सुनसरी जिल्लामै धान उत्पादन घटेको छ, जसका कारण कोशीको कुल उत्पादनमै असर परेको हो ।