पत्नी हत्याकाे ८ वर्षपछि आराेपी पक्राउ

विराटनगर । पत्नीको हत्या गरेर फरार भएकाे आराेपमा प्रहरीले  ८ वर्षपछि पतिलाई पक्राउ गरेको छ । भोजपुर नगरपालिका–६ देउराली घर भएका ६३ वर्षीय नारदमणि राईलाई माेरङकाे बेलबारीबाट प्रहरीले पक्राउ गरेकाे हाे ।

भोजपुर प्रहरीका निमित्त प्रमुख एवं प्रवक्ता इन्स्पेक्टर महेन्द्र पराजुलीका अनुसार २०७४ साल साउन १९ गते पत्नी ४६ वर्षीया अम्बिका श्रेष्ठ (राई)को हत्या गरेकाे अभियाग नारदमणिमाथि छ । सुतिरहेका बेला बिहानका राति १ बजेतिर कुटपिट गरेर पत्नी अम्बिकाको हत्या गरेको उनीमथि अभियाेग थियाे ।

उनलाई प्रहरीले मोरङको बेलबारी नगरपालिका–३ बाट बिहीबार पक्राउ गरी अड्डासार गरेर भोजपुर पुर्याएको छ । पत्नीको हत्यापछि भागेर मोरङ झरेका नारदमणि बेलबारी–३ का छत्रबहादुर गुरुङको घरमा डेरा गरेर बस्दै आएका थिए ।

जिल्ला प्रहरी कार्यालय भोजपुरको हिरासतमा रहेका उनीविरुद्ध कर्तव्य ज्यान मुद्दा चलाउन अदालतबाट म्याद थप गरेकाे प्रहरीले बताएकाे छ ।