आठौं पटक चुनाव लड्ने तयारीमा विजयकुमार गच्छदार

विराटनगर । नेपाली कांग्रेसका प्रभावशाली नेता तथा पूर्वउपप्रधानमन्त्री विजयकुमार गच्छदार पुनः संसदीय निर्वाचनको मैदानमा उत्रिने तयारीमा जुटेका छन् । संसदीय राजनीतिका ‘चतुर खेलाडी’ मानिने ७१ वर्षीय गच्छदारले आगामी फागुन २१ गते हुने प्रतिनिधिसभा निर्वाचनका लागि सुनसरी क्षेत्र नम्बर ३ बाट तयारी थालेका हुन् ।

२०४८ सालयता निरन्तर सातपटक निर्वाचन लडिसकेका गच्छदारका लागि यो आठौं चुनावी यात्रा हुनेछ। तर, यसपटकको यात्रा उनका लागि विगतजस्तो सहज भने देखिएको छैन ।

गच्छदारले क्षेत्र नम्बर ३ बाट आफ्नो नाम सर्वसम्मत (एकल) सिफारिस गराउन चाहेका थिए । यसका लागि उनले क्षेत्रीय समितिलाई दबाब समेत दिए  तर, समितिले गच्छदारको एकल नाम पठाउनुको साटो उनीसहित तीन जनाको नाम सिफारिस गरेको छ ।

सिफारिस हुने अन्य दुई जनामा दुहबी नगरपालिकाका मेयर वेदनारायण गच्छदार र ओम थापा छन्। मेयर वेदनारायण नातामा विजयकुमार गच्छदारका भतिज पर्छन् ।

कांग्रेस जिल्ला सचिव वीरेन्द्र साहका अनुसार क्षेत्रीय समितिको सिफारिसमाथि जिल्ला समितिमा छलफल हुनेछ । उनले भने, ‘विजयकुमार गच्छदारको एकल नाम सिफारिस गर्ने प्रयास भए पनि तीन जनाको नाम आएको मौखिक जानकारी छ। अब बस्ने जिल्ला समितिको बैठकमा यसबारे निर्णय हुनेछ ।’

२०४८ सालयताका ६ वटा निर्वाचनमा अपराजित रहेका गच्छदारले २०७९ को निर्वाचनमा भने पहिलो पटक पराजय भोग्नुपर्‍यो । सो निर्वाचनमा उनी एमाले उम्मेदवार भगवती चौधरीसँग पराजित भएका थिए । त्यसअघि २०७४ को निर्वाचनमा गच्छदारले चौधरीलाई ३२१ मतान्तरले हराउँदा धाँधलीको आरोप समेत लागेको थियो ।

२०४८ देखि २०७४ सम्म १२ पटक मन्त्री बनिसकेका गच्छदारको राजनीतिक यात्रा पछिल्लो समय ओरालो लागेको विश्लेषण गरिन्छ । बालुवाटारस्थित ललिता निवास जग्गा प्रकरणमा भ्रष्टाचार मुद्दा खेपिरहेका उनी विशेष अदालतमा १० लाख धरौटी बुझाएर रिहा भएका हुन् । आफूलाई राजनीतिक प्रतिशोधका आधारमा फसाइएको दाबी गर्दै आएका उनी अब पुनः सक्रिय राजनीति मार्फत जनअनुमोदन खोज्ने तयारीमा छन् ।

गच्छदारले २०४८, २०५१, २०५६ र २०७४ मा कांग्रेसबाट तथा २०६४ र २०७० मा मधेसी जनअधिकार फोरम (र पछि लोकतान्त्रिक फोरम) बाट चुनाव जितेका थिए ।

यी हुन अन्य क्षेत्रबाट सिफारिस उम्मेदवार  

क्षेत्र नं १ : मीनबहादुर विश्वकर्मा, उमेश थापा, चन्द्रशेखर लामा, निर्मला गुरुङ, माधवबहादुर घिसिङ, रुक्मिना गौतम, विनोदकुमार राई र सन्दीप श्रेष्ठ

क्षेत्र नं २: राजीव कोइराला, राजीव ढुङ्गाना र सीताराम मेहता ।

क्षेत्र नं ४: पूर्वमन्त्री ज्ञानेन्द्रबहादुर कार्की, डिल्लीबहादुर कार्की, गफार अन्सारी, अबुल अन्सारी र नवीन श्रेष्ठ ।