संसद् पुनः स्थापनाको रिटले कांग्रेस भित्र विवाद

काठमाडौं । पार्टीमा छलफल नगरी नेपाली कांग्रेस संसद् पुनः स्थापनाको रिट लिएर सर्वोच्च अदालत पुगेको छ । संसद विघटनविरुद्ध आइतबार कांग्रेस निर्वाचन समितिका संयोजकसमेत रहेका पूर्वमहान्यायाधिवक्ता खम्बबहादुर खाँतीले वारेसनामामार्फत रिट सर्वोच्चमा दायर गरेका हुन्।

नेपाली कांग्रेसका प्रमुख सचेतक र सचेतकको हस्ताक्षरमा संसद् पुनः स्थापनाको मागसहित आइतबार रिट दायर भएपछि पार्टी भित्र विवाद सुरु भएको छ । महामन्त्री गगनकुमार थापा उक्त रिट पार्टीको तर्फबाट नभएको तर्क गरेका छन् ।

‘सर्वोच्चमा रिट लिएर नेपाली कांग्रेस गएको छैन । संसदीय दल वा केन्द्रीय समितिबाट रिटमा जाने निर्णय भएको छैन,’ थापाले भनेका छन्, ‘नेपाली कांग्रेसले केन्द्रीय समितिबाट जे निर्णय गरेको छ त्यही नै कार्यान्वयन गर्ने हो ।’

केही नेताले व्यक्तिगत रुपमा रिट दायर गरेको बताउँदै उनले भनेका छन्,‘कांग्रेसको बैठकमा पुनस्र्थापनामा जानुपर्छ भन्ने पनि आवाज आएको थियो । चुनावमा जानुपर्छ भन्ने पनि आवाज आएको थियो। यो त्यही संसद् पुनस्र्थापनामा जानुपर्छ भन्ने पक्षको आवाजको प्रतिनिधित्व हो। निर्वाचनमा जाने हाम्रो निर्णयमा रिटले कुनै फरक पार्दैन । हाम्रो निर्णय कार्यान्वयनमा हामी प्रतिबद्ध छौँ। व्यक्तिगत रूपमा रिट लिएर जाने स्वतन्त्रता सबैलाई छ।’

अन्य नेताले पनि संसदपुनस्थापनाका लागि दायर रिट पार्टीको निर्णयविपरित भएको भन्दै असन्तुष्टि जनाएका छन् ।