नोबेल मेडिकल कलेजमा लापरवाही : ७ वर्षीय बालकले गुमाए एउटा आँखा

विराटनगर । विराटनगरस्थित नोबेल मेडिकल कलेजमा अप्रेशनमा लापरवाही हुँदा सामान्य नाकको शल्यक्रिया गराउन आएका ७ वर्षीय बालक जेनिश पाठकले आँखाको ज्योति गुमाएको फेला परेको छ ।

नाक भित्र पलाएको मासुको शल्यक्रिया गर्दा इटहरी उपमहानगरपालिका–१ हासपोसाका ७ वर्षीय बालक जेनिश पाठकको आँखाको ज्योति गुमेको थियो  । घटनापछि स्वास्थ्य मन्त्रालयले गठन गरेको छानविन समितिले चिकित्सकको ‘लापरवाही’  भएको निष्कर्ष निकालेको हो ।

इटहरी उपमहानगरपालिका–१, हासपोसाका ७ वर्षीय जेनिशको नाकको दाहिने प्वालमा मासु पलाएपछि परिवारले उनलाई गत मंसिर ४ गते नोबेल मेडिकल कलेजमा भर्ना गरेका थिए । अस्पताल प्रशासनले परिवारलाई डा प्रज्वल श्रेष्ठले शल्यक्रिया गर्ने जानकारी गराएको थियो  ।

मंसिर ५ गते शल्यक्रिया सुरु भयो । डा श्रेष्ठकै नेतृत्वमा अप्रेशन थिएटर मा लगिएका बालकको शल्यक्रिया पूरा नहुँदै डाक्टर बाहिर निस्किए । छानबिन समितिका अनुसार, डाक्टर श्रेष्ठले ‘अर्को इमर्जेन्सी बिरामी हेर्नुपर्ने’ भन्दै बीचमै शल्यक्रिया छाडेर हिँडेका थिए । त्यसपछि बाँकी शल्यक्रिया कविराज बास्तोलासहितको सहायक टोलीले पूरा गरेको थियो ।

शल्यक्रियाको भोलिपल्टै बालकको आँखामा गम्भीर समस्या देखियो । अस्पतालले हतार–हतार उनलाई डिस्चार्ज गरिदियो । शंका लागेर परिवारले बालकलाई विराटनगर आँखा अस्पताल पुर्‍याए । त्यहाँ परीक्षण गर्दा ‘दाहिने आँखाको भित्री भाग ड्यामेज भइसकेको र आँखा देख्ने  सम्भावना लगभग नभएकाे  मेडिकल रिपोर्ट आएपछि परिवार छाँगाबाट खसेजस्तै भयो ।

घटनापछि बालकका मामाले जिल्ला प्रशासन कार्यालय मोरङमा उजुरी दिएका थिए । प्रशासनको पत्रपछि स्वास्थ्य मन्त्रालयले वीर अस्पतालका ईएनटी विभागीय प्रमुख डा अनिता जिसीको संयोजकत्वमा तीन सदस्यीय छानबिन समिति गठन गरेको थियो ।

समितिसँगको बयानमा डा प्रज्वल श्रेष्ठले अप्रेशन पुरा नगरी निस्किएको स्वीकार गरेका छन् । स्रोतका अनुसार उनले बयानमा भनेका छन् ‘इमर्जेन्सी बिरामी आएका कारण सहायक डाक्टरलाई जिम्मा लगाएर म निस्किएको हुँ।’

समितिले मुख्य डाक्टरले नै शल्यक्रिया पूरा गरेको भए यस्तो दुर्घटना नहुन सक्ने निष्कर्ष निकालेको छ । छानबिन समितिले पीडित परिवारलाई उचित क्षतिपूर्ति भराउन र लापरवाही गर्ने चिकित्सकमाथि कडा कारबाही गर्न सिफारिस गर्दै १–२ दिनभित्रै प्रतिवेदन बुझाउने तयारी गरेको छ ।