काठमान्डु गोर्खाज एनपीएलको प्लेअफमा

काठमाडौं । पोखरा एभेन्जर्सलाई पराजित गर्दै काठमान्डु गोर्खाज नेपाल प्रिमियर लिग (एनपीएल)को प्लेअफमा पुगेको छ । शाहब आलमले सानदार बलिङ गर्दै ६ विकेट लिएपछि बिहीबार पोखरा एभेन्जर्सलाई १३ रनले पराजित गर्दै काठमान्डुले प्लेअफमा पुगेको हो ।

लिग चरणमा ७ वटै खेल खेलिसकेको काठमान्डुले ५ जित र २ हारबाट १० अंक जोडेर दोस्रो स्थानमा छ ।

६ खेलमा चौथो हार व्यहोरेको पोखराको ४ अंक मात्र छ र प्लेअफ सम्भावना कठिन बनेको छ ।

बिहीबार काठमान्डु गोर्खाजे दिएको १६६ रनको लक्ष्य पछ्याएको पोखरा एभेन्जर्सले पूरै २० ओभर खेल्दै १० विकेट गुमाएर १५२ रन मात्र बनाउन सक्यो ।

काठमान्डुका शाहब आलमले २०औं ओभरको सुरुवाती तीन बलमा लगातार विकेट लिँदै ह्याट्रिक पूरा गरेका थिए । शाहबले ४ ओभरमा २५ रन खर्चेर एक्लै ६ विकेट लिए ।