धनकुटामा पुन प्रतिनिधि छान्न एमालेको निर्देशन

विराटनगर । नेकपा एमालेको ११ औं राष्ट्रिय महाधिवेशन प्रतिनिधिका लागि धनकुटामा पुन मतदान गर्नुपर्ने भएको छ । केन्द्रीय कमिटीले यसअघि भएको निर्वाचनलाई मान्यता नदिएपछि पुन निर्वाचन गर्नुपर्ने भएको हो ।

जिल्लामा यसअघि देखि नै नै राजेन्द्र राई र इन्द्रमणी पराजुली पक्षबीच विवाद छ । मंसिर १३ गते भएको निर्वाचनमा राई पक्षबाट १३ जना निर्वाचित भएका थिए । अर्काे पक्षले मतदान एकलौटी गरेको भन्दै विरोध जनाएको थियो ।

केन्द्रले प्रतिनिधि छनोट स्वच्छ, निष्पक्ष र पारदर्शी नभएको ठहर गर्दै ५ दिनभित्र पुनः निर्वाचन गर्न निर्देशन दिएको छ ।

केन्द्रले कोशी प्रदेश इन्चार्ज शेरधन राई र जिल्ला इन्चार्ज राजेन्द्र राईलाई निर्वाचन सम्पन्न गर्न निर्देशन दिएको छ । उनीहरुबीच सम्बन्ध राम्रो छैन । एक–अर्कासँग ‘राम्रो सम्बन्ध नभएका’ दुई नेतालाई नै केन्द्रले विवाद समाधान र सहजीकरणको जिम्मा दिएको हो । यसअघि ओखलढुंगामा पुनः प्रतिनिधि छनौट गर्न एमाले केन्द्रले निर्देशन दिएको थियो ।