ओखलढुंगामा पुन प्रतिनिधि छनाेट गर्न एमालेकाे निर्देशन

विराटनगर । नेकपा (एमाले) केन्द्रीय कार्यालयले ओखलढुंगा जिल्लाको महाधिवेशन प्रतिनिधि छनौट प्रक्रिया रद्द गर्दै पुन निर्वाचन गर्न निर्देशन दिएकाे छ ।

जिल्ला सदरमुकाममा सम्पन्न भनिएको प्रतिनिधि छनौटकाे निर्वाचनमा इतर पक्ष विजयी भएकाे थियाे । तर, निर्वाचन प्रक्रिया विधि र निर्देशन विपरित भएको भन्दै केन्द्रले  अस्वीकार गर्दै ५ दिन भित्र निर्वाचन गर्न निर्देशन दिएकाे हाे ।

एमाले केन्द्रीय संगठन विभागका प्रमुख काशीनाथ अधिकारीद्वारा हस्ताक्षरित पत्रमा ८ मध्ये ६ वटा पालिका कमिटीहरूको माग र बहुसंख्यक उम्मेदवारहरूको असहमति रहँदा रहँदै जबर्जस्ती प्रतिनिधि छनौट गरिएको उल्लेख छ । साथै, प्रदेश पार्टी कमिटी र केन्द्रीय संगठन विभागको निर्देशन समेतको अवज्ञा गरी सदरमुकाममा सम्पन्न भनिएको उक्त निर्वाचन स्वीकार गर्न नसकिने पत्रमा स्पष्ट पारिएको छ ।

केन्द्रले जिल्ला कमिटी ओखलढुंगालाई पत्र काट्दै प्रभावकारी माध्यमबाट सबै सदस्यलाई सूचना सम्प्रेषण गरी पालिकास्तरमा नै मतदान केन्द्रको व्यवस्थापन गरेर पाँच दिनभित्र पुनः निर्वाचन गर्न कडा निर्देशन दिएको छ ।