पूर्वी नेपालमा कुलमान घिसिङकाे दुई दिन : वैकल्पिक शक्तिलाई एकताकाे सन्देश, हर्कले भेट्न मानेनन्

विराटनगर । ‘उज्यालो नेपाल पार्टी’ को घोषणासँगै राजनीतिक गतिविधि बढाएका ऊर्जा तथा भौतिक पूर्वाधार विकास मन्त्री कुलमान घिसिङले दुई दिन पूर्वी नेपालमा बिताए । सरकारी संरचनाको निरीक्षणका लागि आइतबार आएका उनले राजनीतिक भेटघाट पनि गरे ।

आइतबार धरान र सोमबार मोरङको बेलबारीमा आयोजित कार्यक्रममा उनले वैकल्पिक शक्तिहरू एक भएर अघि बढ्नुपर्ने बताए । बेलबारीमा आयोजित अन्तरक्रियामा पार्टीको नाम उल्लेख नभए पनि ब्यानरमा घिसिङको तस्बिर राखिएको थियो, जहाँ स्थानीयले उनलाई भव्य स्वागत गरे ।

वैकल्पिक शक्ति एक हुनुपर्छ

बेलबारीस्थित आदिवासी जनजाति महासंघको भवनमा करिब १२ मिनेट सम्बोधन गर्दै घिसिङले देशको समृद्धिका लागि नयाँ र वैकल्पिक शक्तिहरू मिल्नुको विकल्प नभएको बताए । ‘देशको समृद्धिका लागि एउटा क्षेत्रको उज्यालोले मात्र पुग्दैन,’ उनले भने,’ हामीले सुशासन, सामाजिक न्याय, र गरिबी निवारणको उज्यालो ल्याउनुपर्छ। रोजगारी सिर्जना गरेर विदेश जाने बाध्यता अन्त्य गर्ने उज्यालो आवश्यक छ।’

रवि लामिछाने र बालेन शाहसँगको एकताका विषयमा सोधिएको प्रश्नमा उनले सबै वैकल्पिक शक्ति एक भएर अघि बढ्नुपर्नेमा जोड दिए । ‘हामी नयाँ भनिने र वैकल्पिक शक्तिहरूले एक-अर्काको विरोध गर्नुभन्दा पनि एकताबद्ध भएर अघि बढ्ने दिन आएको छ,’ उनले भने।

कार्यक्रमको अन्त्यमा स्थानीय पत्रकारहरूले घिसिङलाई  प्रश्न पनि गरेका थिए । चुनावपछि प्रधानमन्त्री को बन्छ – तपाईं कि रवि लामिछाने?’ भन्ने अन्तिम प्रश्नको भने उनले जवाफ दिएनन्, केवल मुस्कुराएर फर्किए ।

हर्क साम्पाङले भेट्न मानेनन्

कुलमान घिसिङको कार्यक्रममा भेला भएका धेरैजसो समर्थक धरानका मेयर हर्क साम्पाङका समेत शुभचिन्तक थिए । उज्यालो नेपाल पार्टीका नेता डकेन्द्रसिंह थेगिमको पहलमा यो भेला आयोजना गरिएको थियो ।

घिसिङले आइतबार धरान पुग्दा मेयर साम्पाङलाई भेट्ने इच्छा व्यक्त गरेका थिए । तर, श्रम संस्कृति पार्टीका अध्यक्ष समेत रहेका साम्पाङले व्यस्तताको कारण देखाउँदै समय नदिएपछि भेटघाट हुन सकेन । यद्यपि, श्रम संस्कृति पार्टीका महासचिव आरेन राईले भने आफूहरू पनि वैकल्पिक शक्तिहरू मिल्नुपर्ने पक्षमा रहेको तर अध्यक्षको व्यस्तताले भेट हुन नसकेको हुन सक्ने बताए ।

राजनीतिक भेटघाटबाहेक मन्त्री घिसिङले विकास आयोजनाहरूको निरीक्षणमा पनि समय बिताए । कोशी अस्पतालको निर्माणाधीन भवनको निरीक्षण गर्दै काममा ढिलासुस्ती गर्ने ठेकेदारलाई मजदुर थपेर कामको गति बढाउन कडा निर्देशन दिए ।

धरान र बेलबारीको भेटघाटपछि उनले निर्माणाधीन राजमार्गको निरीक्षण गरे। ठेकेदारले माटो र गिटी-बालुवाको अभावले काम ढिलो भएको गुनासो गरेपछि मन्त्री घिसिङले आश्चर्य प्रकट गर्दै वन मन्त्रालयसँग सहजीकरण गरिदिने आश्वासन दिए ।

दमक र झिलझिलेमा निर्माणाधीन संरचनाहरूको निरीक्षणपछि मन्त्री घिसिङ सोमबार दिउँसो भद्रपुर विमानस्थल हुँदै काठमाडौं फर्किएको नेता डकेन्द्रसिंह थेगिमले जानकारी दिए ।