एमालेको दोहोरो नीति : निर्वाचन र प्रतिनिधिसभा पुनर्स्थापनाको मुद्दा सँगसँगै

काठमाडौं । नेकपा एमालेले प्रतिनिधिसभाको निर्वाचनको तयारी र संसद्  पुनर्स्थापनाको मुद्दासँगसँगै लिएर अघि बढेको छ ।

संसद पुनर्स्थापनाको माग गर्दै आएको एमाले तत्काल प्रतिनिधिसभा निर्वाचनको विपक्षमा छ । कांग्रेस, नेकपासहितका दल निर्वाचनको पक्षमा उभिएपछि एक्लिएको एमालेले मंगलबार निर्वाचन आयोग पुगेर दल दर्ता गरेको छ ।

मंगलबार नै सर्वाेच्च अदालतमा पुगेर संसद पुनर्स्थापनाका लागि निवेदन दर्ता गरेको छ ।

निर्वाचन आयोगमा दल दर्तापछि एमाले निर्वाचन विभागका प्रमुख निरज आचार्यले एमाले सबै प्रकारका चुनावका लागि कानूनी प्रक्रिया पूरा गरेर बस्ने पार्टी भएकोले त्यसै अनुसार दल दर्ता गरिएको बताए ।

प्रतिनिधिसभा सदस्यको निर्वाचन प्रयोजनका लागि मंसिर १० गतेसम्म दल दर्ताको समय छ । सोमबारसम्म ६४ दलले निर्वाचन प्रयोजनका लागि दल दर्ता गरेका थिए ।

मंगलबार नै एमालेको प्रतिनिधिसभा संसदीय दलका प्रमुख सचेतक महेश बर्तौला र सचेतक सुनिता बरालले मंगलबार रिट दर्ता गरेका हुन् ।

‘असंवैधानिक रुपमा विघटित प्रतिनिधिसभा पुनर्स्थापनाको माग सहित रिट निवेदन नेकपा एमाले संसदीय दलको तर्फबाट सर्वोच्च अदालतमा पेस भएको छ’, बर्तौलाले भने ।

जेनजी आन्दोलनपछि केपी शर्मा ओलीले प्रधानमन्त्रीबाट राजीनामा दिएका थिए । आन्दोलनपछि बनेकी प्रधानमन्त्री सुशीला कार्कीले गत भदौ २७ गते संसद विघटनका लागि सिफारिस गरेकी थिइन् । उनको सिफारिसमा राष्ट्रपति रामचन्द्र पौडेलले प्रतिनिधिसभा विघटन गरेका थिए ।

सरकारले आगामी फागुन २१ गते प्रतिनिधि सभा निर्वाचनको मिति तोकेको थियो ।