‘इस्टर्न डर्बी’मा जनकपुरमाथि विराटनगरकाे राेमाञ्चक जित

काठमाडौं । नेपाल प्रिमियर लिग (एनपिएल) सिजन-२ मा विराटनगर किंग्सले जनकपुर बोल्ट्समाथि रोमाञ्चक जित निकालेको छ ।

विराटनगरले दिएको १३६ रनको सामान्य लक्ष्य पछ्याएको जनकपुर २० ओभरमा ९ विकेट गुमाएर १२६ रनमा समेटियाे ।

जनकपुरको लागि निकोल लोफ्टी इन्टोनले सर्वाधिक ४१ रन बनाए पनि जितका पर्याप्त हुन सकेन । लाहिरु मिलान्था २३, आसिफ शेख १३, कप्तान अनिलकुमार शाह ४, सन्जय कृष्णमुर्ति २० र मायन यादव ४ रनको योगदान दिए ।

बलिङमा विराटनगरका कप्तान सन्दीप लामिछाने चम्किए । ४ ओभरमा ११ खर्चेर सन्दीपले ४ विकेट लिए । सूर्य तामाङले २, मार्चेन डि लिंगेले र शिभम रन्जनेले एक/एक विकेट लिए ।

टीयु क्रीकेट मैदानमा टस हारेर पहिला ब्याटिङ गरेको विराटनगरले २० ओभरमा ७ विकेट गुमाएर १३५ रन बनाएको थियो ।

विराटनगरका लागि शिवम रन्जानेले सर्वाधिक ३७ रन बनाए । बसिर अहमद ३६, ओपनर लोकेश बम २८, जर्ज मुन्से १०, गप्टिल मार्टिन १३ र नारायण जोशी २ रनमा आउट भए । याे विराटनगरकाे लगातार तेस्राे जित हाे ।

पूर्वी नेपालका दुई टाेलीबीचकाे खेललाई ‘इस्टर्न डर्बी’काे नाम दिइएकाे थियाे ।