एनपीएलमा आज पूर्वपश्चिमका दुई खेल

काठमाडौं । नेपाल प्रिमियर लिग (एनपीएल)मा आज दुई खेल आयोजना हुँदै छन् ।

प्रतियोगितामा आज पूर्वी नेपालका दुई टोली जनकपुर बोल्ट्स र विराटनगर किंग्सले प्रतिस्पर्धा गर्दै छन् । पश्चिमका दुई टिम सुदूरपश्चिम रोयल्स र कर्णाली याक्सबीचकाे प्रतिस्पर्धा पनि आजै छ ।

पहिलो खेल जनकपुर र विराटनगरबीच हुनेछ । कीर्तिपुरस्थित त्रिवि क्रिकेट रंगशालामा हुने यो खेल बिहान ११ः४५ बजेदेखि सुरु हुनेछ ।

प्रतियोगितामा आज साविक विजेतासमेत रहेको जनकपुर पहिलो जितको खोजीमा छ । जनकुपर यसअघि उद्घाटन खेलमा काठमाण्डू गोर्खाजसँग पराजित भएकाे थियो ।

प्रतियाेगितामा उत्कृष्ट लयमा रहेकाे विराटनगर लगातार तेस्रो जितको खाेजीमा हुनेछ । विराटनगरले यसअघि पहिलो खेलमा पोखरा एभेन्जर्सविरुद्ध ५३ रनको र काठमाण्डू गोर्खाजविरुद्ध पाँच विकेटको जित निकालेको थियो ।

साविक उपविजेता सुदूरपश्चिम र कर्णाली याक्सबीचकाे खेल  दिउँसाे ४ बजे सुरु हुनेछ । प्रतियोगितामा अपराजित सुदूरपश्चिमले यसअघि काठमाण्डू र पोखरालाई पराजित गरेको थियो ।