महेश बस्नेतमाथि विराटनगरमा मसी प्रहार, दुहबीमा टायर बालेर प्रदर्शन

विराटनगर । विराटनगरमा नेकपा एमाले नेता महेश बस्नेत सवार गाडीमा जेनजी युवाले रातो मसी छ्यापेका छन् । सुनसरीकाे दुहबीमा भने स्थानीय युवाले टायर बालेर प्रदर्शन गरेका छन् ।

एमाले नेता भानुभक्त ढकाल र महेश बस्नेत सवार कारमा विमानस्थल अगाडि युवाहरुले रातो मसी फ्याँकेका हुन् ।

महेश बस्नेत युवा संघको कोशी प्रदेशस्तरीय भेलामा सहभागी हुन इटहरी जाने क्रममा  रातो मसी फ्याकेपछि प्रहरीले दुईजनालाई पक्राउ गरेकाे छ । पक्राउ पर्नेमा विराटनगर-२ का १९ वर्षीय अर्पित कुँवर र विराटनगर-१ का २५ वर्षीय संजोग गौतम छन् ।  उनीहरुलाई जिल्ला प्रहरी कार्यालय मोरङमा राखिएको छ ।

प्रहरी भ्यानमा राखेर जिल्ला प्रहरी कार्यालयमा लगिरहँदा पनि जेनजी युवाहरुले महेश बस्नेतविरुद्ध नारा लगाएका थिए ।

कार्यक्रममा जान अवरोध पुर्‍याउन खोजिएको भन्दै महेश बस्नेतले ‘लोकतन्त्रमाथिको उपहास’ भएकाे बताएका छन् ।

महेश बस्नेत र एमाले नेता भानुभक्त ढकाल सवार भएको गाडी क्रस भइसकेपछि दुबहीमा स्थानीय युवाहरुले टायर बालेर प्रदर्शन गरेका हुन् ।

जिल्ला प्रहरी कार्यालय सुनसरकिा डिएसपी चन्द्र खढ्काका अनुसार सडकमा बालिएको आगो प्रहरीले क्लियर गरिसकेको छ । ‘उहाँहरु क्रस भइसकेपछि टायर बालिएको थियो,’ उनले भने,‘ प्रहरीले क्लियर गरिसकेको छ ।’