दुई बालिकाको वीभत्स हत्या : एउटाको अनुसन्धान जटिल, अर्काे शवको पहिचान खुलेन

विराटनगर । मोरङमा पछिल्लो ३ महिनाको अन्तरमा अलगअलग स्थानमा दुई बालिकाको हत्या भयो । ३ महिनाको अन्तरमा हत्या गरेर फालेको अवस्थामा २ बालिकाको शव फेला परेपनि संलग्नसम्म प्रहरी पुग्न सकेकाे छैन ।

दुवै प्रकरणको अनुसन्धानमा पनि गरिरहेको छ । गत असार र असोज महिनामा मोरङका नग्न अवस्थामा मृत फेला परेका २ बालिकाको शवको अनुसन्धान अघि बढे पनि एउटा घटनामा पीडितको पहिचान खुल्न सकेको छैन भने अर्को घटनामा हत्यारासम्म प्रहरी पुग्न सकेको छैन ।

प्रहरीको प्रारम्भिक अनुसन्धानले दुवै घटनामा बलात्कारपछि हत्या भएको देखाउँछ । तर, शव सडेको अवस्थामा फेला परेका कारण मेडिकल रिपोर्टबाट बलात्कार पुष्टि हुन सकेको छैन ।

 अंशु गौतमको हत्या अनुसन्धानमै

मोरङको लेटाङ नगरपालिका–२, स्कुलचोकबाट पिङ खेल्न निस्किएकी १३ वर्षीया अंशु गौतम गत असोज २१ गते बेपत्ता भएकी थिइन् । कार्तिक ७ गते बेलबारी–चिसाङ साझेदारी वनभित्र क्षतविक्षत अवस्थामा उनको शव फेला परेको थियो ।

शरीर र टाउको छुट्टिएको, शरीरमा कपडा नभएको अवस्थामा शव फेला पर्यो । चप्पल र कपडाका आधारमा शव गौतमको रहेको पहिचान भएको थियो ।

अनुसन्धानका सबै उपाय प्रयोग गरे पनि प्रहरी घटनामा संलग्नसम्म पुग्न सकेको छैन । प्रहरी पछिल्लो समय पोलिग्राफ जाँचमा केन्द्रित भएको छ । बालिकाले मोबाइल प्रयोग नगर्ने भएकाले अनुसन्धान थप जटिल बनेको प्रहरीले जनाएको छ ।

अनुसन्धानमा प्रदेश प्रहरी र जिल्ला प्रहरीको टोली संयुक्त रूपमा खटिएको छ । हत्यामा संलग्नलाई पक्राउ नगरेसम्म शव नबुझ्ने अडान परिवारको छ । शवलाई बीपी कोइराला स्वास्थ्य विज्ञान प्रतिष्ठान धरानमै शव राखिएको छ ।

लेटाङकी अंशुको हत्यामा संलग्नको खोजी भइरहेको मोरङ प्रहरी प्रवक्ता डीएसपी कोपिला चुँडालले बताइन् । ‘अनुसन्धानका सबै विधि प्रयोग गरिरहेका छौं,’ उनले भनिन्, ‘निष्कर्षमा पुगिसकिएको छैन, अनुसन्धान जारी छ ।’ बालिका घरबाट पिङसम्म पुगेको देखिन्छ ।

पिङबाट कसरी जंगलमा पुगिन् भन्ने खुलेको छैन । बालिकाले मोबाइल प्रयोग नगर्ने भएकाले अनुसन्धान जटिल भइरहेको प्रहरीको भनाइ छ । प्रहरीको संयुक्त टोलीले अनुसन्धान गरिरहेको छ ।

बुढीगंगा भेटिएको शवको पहिचान खुलेन

गत असार २८ गते सुनसरी–मोरङ सिँचाइ आयोजनाको नहर किनारमा रहेको झाडीमा अन्दाजी १४–१५ वर्षकी एक बालिकाको नग्न र सडेएको अवस्थामा शव फेला परेको थियो । शवमा किरा परिसकेको र दुर्गन्ध फैलिएपछि देखेका स्थानीयले प्रहरीलाई खबर गरेका थिए ।

मृत फेला परेकी बालिकाको ४ महिनासम्म पनि पहिचान खुल्न नसकेपछि प्रहरीले मृतक नेपाली नभएको निष्कर्ष निकालेको छ । प्रहरीले देशभर र भारतीय पक्षलाई समेत हुलिया पठाएर खोजी गर्दा पनि पहिचान गर्न नसकिएको डीएसपी चुँडालले बताइन् ।

‘हामीले सबै जिल्लाहरुमा हुलिया पठाएर खोजी गर्यौ । कतै, त्यसबेला बालिका हराएको सूचना छैन,’ उनले भनिन्, ‘बालिका भारतीय हुन् कि भन्ने शंकाले भारतीय पक्षलाई पनि सम्पर्क गरेका थियौं ।’

प्रहरीले डीएनए रिपोर्ट र हुलियाको विवरण सुरक्षित राखेर बेवारिसे शवको अन्त्यष्टिका लागि विराटनगर महानगरपालिकालाई पत्र लेखेको छ । यो घटनाको अनुसन्धान हाल मुल्तबीमा राखिएको छ ।