पुर्खौली पेशालाई आधुनिक उद्यमसँग जोडेका सञ्जय ठाकुर (भिडियाे)

विराटनगर । मोरङको बुढीगंगा गाउँपालिका– ३, बाँसवारीका सञ्जयकुमार ठाकुरले आफ्नो पुर्खौली काठको कामलाई आधुनिक फर्निचर उद्योगमा रूपान्तरण गर्दै उदाहरणीय सफलता हासिल गरेका छन् ।

उनले सञ्चालन गरेको ‘सञ्जय फर्निचर उद्योग’ले स्थानीयस्तरमा रोजगारी सिर्जना गरेको छ । उनको परिवारको जीवनस्तरमा समेत उल्लेख्य सुधार ल्याएको छ ।

सञ्जयका बुवा घर–घर गएर काठको काम गर्थे,जुन पेशालाई सञ्जयले आधुनिकतातर्फ डोर्‍याए । ‘यो कामभन्दा अगाडि मैले टिचिङ र बाइकको काम पनि गरेँ,’ उनी भन्छन्,‘ तर, मलाई आफ्नै पुर्खौली पेशा नै ठिक लाग्यो, यसमा कमाइ पनि हेरेँ ।’

पुर्खौली काममा लगनशीलता र उद्यमशीलता थपेर उनले २५ वर्षभन्दा बढी समयदेखि निरन्तरता अघि बढिरहेका छन् ।

सुरुमा एउटा सानो सटरको कोठाबाट सुरु भएको उनको व्यवसाय अहिले तीनवटा सटरमा विस्तार भएको छ । व्यवसाय विस्तारका लागि उनले उद्योगमा नयाँ मेसिनहरू पनि थप गरेका छन् । उनको उद्योगमा ६ जनाले नियमित रोजगारी पाएका छन् ।

उनको यो सफलताको पछाडि जीवन विकास लघुवित्त वित्तीय संस्थाको निरन्तर सहयोग महत्वपूर्ण छ । सञ्जयकी श्रीमती फूलकुमारी ठाकुर, १५ वर्षअघि जीवन विकासको सदस्य बनेकी थिइन् । सुरुमा उनले १० हजार रुपैयाँ ऋण लिएर व्यवसायमा लगाएकी थिइन् । ‘त्यही १० हजारबाट काठ किन्दै, बनाउँदै, किस्ता तिर्दै गर्दै अहिले ७ लाखसम्म ऋण पुगेको छ,’ उनले भनिन् ।

जीवन विकासको सहयोगबाट उनीहरूले दुई ठाउँमा जग्गा जोड्न सफल भएका छन् । व्यवसायको आम्दानीले छोराछोरीलाई उच्च शिक्षा दिएका छन् । छोरीलाई स्टाफ नर्स र छोरालाई विज्ञान विषय पढाएको पनि उनले जानकारी दिइन् ।

सञ्जय जीवन विकास लघुवित्तको सहयोगबाट खुसी छन् । उनी भन्छन्,‘जीवन विकासको नाम नै विकास छ, त्यही हिसाबले मैले पनि विकास पाएको छु ।’

उनले उत्पादन गरेका फर्निचरहरू काठमाडौँसम्म पुग्ने गरेका छन्, जसले उनको कामको गुणस्तर र बजार पहुँचलाई देखाउँछ ।

भविष्यमा व्यवसायलाई थप विस्तार गर्दै लैजाने योजना पनि बनाएका छन् । ‘अरू कुनै कामै जानिँदैन,’ उनी भन्छन्,‘ यसैलाई मैले प्रोत्साहन दिने हो, यसैलाई बढाउने हो ।’