झुम्का कारागारबाट अझै ५५७ कैदीबन्दी फरार

विराटनगर । जेनजी आन्दोलनका क्रममा गत भदौ २४ गते सुनसरीको झुम्का कारागारबाट भागेका मध्ये ५५७ जना कैदीबन्दी अझै फरार छन् ।

उनीहरु अहिलेसम्म कारागार प्रशासन र सुरक्षा संयन्त्रको सम्पर्कमा छैनन् । फरारमध्ये धेरैजसो गम्भीर तथा संगठित अपराधमा संलग्न  छन् ।

झुम्का कारागारका जेलर सुवासकुमार लामिछानेका अनुसार फरारमध्ये सबैभन्दा धेरै १ सय ९८ जना लागुऔषध मुद्दाका कैदी छन् । जबरजस्ती करणीका १ सय ६१ जना, कर्तव्य ज्यानका ७३, चोरीका ३०, डकैतीका १३, अपहरण तथा मानव बेचबिखनका २३, ज्यान मार्ने उद्योगका १२, हातहतियार तथा खरखजाना सम्बन्धी मुद्दाका २ छन् । त्योबाहेक ठगी, अभद्र व्यवहार, सामान्य झगडा तथा अन्य विभिन्न मुद्दाका ४४ जना कैदी फरार सूचीमा छन् ।

भदौ २४ गते कारागारबाट १ हजार ७ सय ९६ कैदीबन्दी फरार भएका थिए । तीमध्ये १ हजार १ सय ९७ जना फर्किसकेका छन् ।