मेयर छाडेर चुनाव लड्ने तयारी गर्दैछन् हर्क साम्पाङ

काठमाडौं । धरानका मेयर हर्क साम्पाङ फागुन २१ को प्रतिनिधिसभा चुनाव सुनसरी–१ बाट लड्ने भएका छन् । मेयरको कार्यकाल बाँकी हुँदै उनले राजीनामा दिएर प्रतिनिधिसभा निर्वाचन लड्ने तयारी गरेका हुन् ।

२०७९ को स्थानीय तह निर्वाचनमा स्वतन्त्र उम्मेदवार बनेर धरान उपमहानगरको मेयर बनेका साम्पाङले आफ्नै नेतृत्वको श्रम संस्कृति पार्टी दर्ता गरिसकेका छन् ।

श्रम संस्कृति पार्टीका महासचिव आरएन राई पनि पार्टी अध्यक्षसमेत रहेका मेयर साम्पाङले सुनसरी–१ बाट प्रतिनिधिसभा निर्वाचन लड्ने तयारी गरिरहेको जानकारी दिए ।

सामाजिक अभियन्ताका रुपमा काम गरेका साम्पाङले २०७९ को स्थानीय चुनावमा २० हजार ८२१ मत पाएर मेयर पदमा विजयी भएका थिए । त्यसबेला नेपाली कांग्रेसका किशोर राई १६ हजार ५९ मत प्राप्त गर्दै दोस्रो बनेका थिए । नेकपा एमालेकी मञ्जु भण्डारी १२ हजार ८२५ मत पाएर तेस्रो बनेकी थिइन् । २०७६ मा धरानको स्थानीय तह उपनिर्वाचनमा उम्मेदवार बनेका बेला उनले ४२२ मत मात्र पाएका थिए ।

मेयर साम्पाङले चुनाव लड्ने तयारी गरिरहेको सुनसरी–१ नम्बर निर्वाचन क्षेत्रमा धरान उपमहानगरका २० वटै वडा, बराह क्षेत्र नगरपालिकाको १ देखि ५ वडा र रामधुनी नगरपालिकाकाका ६ र ७ नम्बर वडा छन् ।

२०७९ को प्रतिनिधिसभा चुनावमा सुनसरी–१ बाट जनता समाजवादी पार्टी नेपालका तर्फबाट अशोक राई निर्वाचित भएका थिए । राईले १७ हजार ५९ मत प्राप्त गर्दा राष्ट्रिय स्वतन्त्र पार्टीकी उम्मेदवार गोमा तामाङले १६ हजार ६०६ मत र तेस्रो बनेका माओवादीका मुक्सामहाङ सुब्बाले १३ हजार ८७ मत प्राप्त गरेका थिए ।

सुनसरी–१ बाट २०४८ मा मनमोहन अधिकारी, २०५१ मा लिला श्रेष्ठ सुब्बा, २०५६ मा कुन्ता शर्मा विजयी भएका थिए । सुनसरी–१ मा २०६४ को पहिलो संविधानसभा निर्वाचनमा माओवादीका किरण कुमार राईले जितेका थिए । २०७० को दोस्रो संविधानसभा निर्वाचनमा एमालेबाट कृष्णकुमार राई र २०७४ मा एमालेकै जयकुमार राई निर्वाचित भएका थिए ।