मधेसकाे मुख्यमन्त्री नियुक्तिविरुद्धकाे रिटकाे पेसी आज

काठमाडौं । मधेसको मुख्यमन्त्री नियुक्तिविरुद्ध ७४ सांसदको दर्ता गरेको रिटमा सर्वाेच्च अदालतले आजका लागि पेसी तोकेको छ । मधेस प्रदेशमा मुख्यमन्त्री नियुक्तिविरुद्ध ७४ सांसदले सर्वोच्चमा रिट दायर गरेका थिए । कुल ११० सदस्यीय प्रदेशसभा छ ।

सांसदहरुले नियुक्तिको निर्णय स्थगन गरी पुनः संवैधानिक आह्वानका लागि अन्तरिम आदेश माग गरेका छन् । सांसदहरूको हस्ताक्षरसहित वारिस बनेर कांग्रेस संसदीय दलका नेता कृष्ण यादवले रिट दर्ता गरेका थिए ।

सर्वोच्च अदालतका प्रवक्ता सहरजिस्ट्रार अर्जुनप्रसाद कोइरालाका अनुसार, रिटमा आजका लागि पेसी तोकिएको छ ।

मधेस प्रदेश प्रमुखको कार्यालयमा एक महिनाअघि एमालेले कांग्रेस संसदीय दलका नेता यादवलाई समर्थन दिएर प्रस्ताव दर्ता भएको थियो । तर, जनमत पार्टीको आन्तरिक द्वन्द्वका कारण लोसपाका जितेन्द्र सोनाल मुख्यमन्त्री बनेका थिए । उनले बहुमत पाउने अवस्था नबनेपछि राजीनामा घोषणा गरेका थिए ।

संविधानको धारा १६८(२) अनुसार, नियुक्त भएका सोनालले विश्वासको मत नै नमागी पदबाट राजीनामा दिएपछि त्यही धारा अनुरूप सरकार गठनको प्रक्रिया बाँकी रहेको सातदलीय गठबन्धनको दाबी छ । दाबी छल्न प्रदेश प्रमुखले उपचारका लागि काठमाडौं जाने भन्दै मुख्यमन्त्रीसँग बिदा भएर होटेलबाट नयाँ मुख्यमन्त्री नियुक्त गर्दै एमाले संसदीय दलका नेता सरोज यादवलाई शपथ खुवाएकी थिइन् । हाेटलमा मुख्यमन्त्रीकाे शपथ गराएपछि मधेसमा विवाद छ ।