विराटनगरकाे बरगाछीमा ट्रकको ठक्करबाट श्रीमतीको मृत्यु, श्रीमान घाइते

विराटनगर । विराटनगरको बरगाछी चोक नजिकै ट्रकको ठक्करबाट महिलाको मृत्यु भएको छ । विराटनगर महानगरपालिका–३ बरगाछी चोक नजिकै मंगलबार साँझ भारतीय नम्बरको ट्रकले ठक्कर दिँदा सर्लाही हरिपुर नगरपालिका– १ की ४५ वर्षीया रोहिता अधिकारी कोइरालाको मृत्यु भएको हो ।

प्रहरीका अनुसार कञ्चनबारीबाट दक्षिणतर्फ आउँदै गरेको डब्लुबी ५९ सी ०२४८ नम्बर भारतीय ट्रकले सोही दिशातर्फ आउँदै गरेको प्रदेश २–०३–०११ प ४३४१ नम्बरको मोटरसाइकललाई ठक्कर दिएको थियो । ठक्करबाट गम्भीर घाइते महिलाको कोशी अस्पतालमा मृत्यु भएको हो ।

मोटरसाइकल चालक मृतकका श्रीमान ५७ वर्षीय विमल कोइराला घाइते छन् । उनको अवस्था सामान्य छ ।

ट्रक र ट्रक चालक भारत बिहारको सिमान्त जिल्ला बडहरियाका ४० वर्षीय कन्हैया यादवलाई नियन्त्रणमा लिएको मोरङका ट्राफिक प्रहरी निरीक्षक सन्तोष न्यौपानले जानकारी दिए ।