विवादित मधेश प्रदेश प्रमुख पदमुक्त

काठमाडौं । अन्तरिम सरकारले विवादित मधेश प्रदेश प्रमुख सुमित्रा सुवेदी भण्डारीलाई पदबाट हटाएको छ ।

सोमबार बसेको मन्त्रिपरषद्को बैठकले उनलाई पदबाट हटाएको हो । भण्डारीलाई पदमुक्त गरेको सरकारले सुरेन्द्र लाभ कर्णलाई प्रदेश प्रमुख नियुक्तका लागि राष्ट्रपति समक्ष सिफारिस गरेको छ ।

बिरामी छु भन्दै उपचारका लागि जनकपुरबाट काठमाडौं हिडेकी मधेश प्रदेश प्रमुख भण्डारीले आधा बाटोबाटै नयाँ सरकार गठन गरेपछि विवाद सुरू भएको थियो ।

सोमबार बिहान होटलमा उनले संविधानको धारा १६८ को उपधारा ३ अनुसार एमाले संसदीय दलका नेता सरोज यादवलाई मुख्यमन्त्री नियुक्त गरेकी थिइन् । नियुक्तीको विरोधमा मधेश प्रदेशको राजधानी जनकपुरमा विरोध प्रदर्शन भएको थियो ।

संविधानको धारा १६८ को उपधारा २ अनुसार नयाँ सरकार गठनको सम्भावना हुँदाहुँदै उपधारा ३ अनुसार होटलबाट नयाँ सरकार गठन गरेपछि सर्वोच्च अदालतमा रिट पनि दर्ता भएको छ ।