संघको परिपत्र विपरित कोशीले स्वीकृत गर्याे अस्थायी दरबन्दी

विराटनगर । संघीय सरकारको परिपत्र विपरित कोशी प्रदेश सरकारले ३९ जना अस्थायी कर्मचारीको दरबन्दी स्वीकृत गरेको छ ।

जेनजी आन्दोलनपछि बनेको अन्तरिम सरकारले गत असोज ५ गते परिपत्र गर्दै सार्वजनिक सेवालाई चुस्त छरितो र मितव्यायी बनाउन अनावश्यक संरचना र दरबन्दी घटाउन परिपत्र गरेको थियो । तर,आइतबार बिहान बसेको कोशी प्रदेश मन्त्रीपरिषद् बैठकले पर्यटन वन तथा वातावरण मन्त्रालय मातहतका चार कार्यालयहरुमा ३९ जना अस्थायी कर्मचारीको दरबन्दी स्वीकृत गरेको हो ।

मन्त्रालयले गरेको प्रस्तावमा दरबन्दी स्वीकृत गरेको आन्तरिक मामिला तथा कानुन मन्त्री रेवतीरमण भण्डारीले जानकारी दिए ।

पर्यटन वन तथा वातावरण मन्त्रालयका सचिव डाक्टर इन्द्रप्रसाद सापकोटाका अनुसार पर्यटन विकास आयोजना विराटनगर, पर्यटन कार्यालय धरान र काकडभिट्टा, जलाधार व्यवस्थापन कार्यक्रम कार्यान्वयन इकाई विराटनगरको दरबन्दी स्वीकृत भएको हो ।

मन्त्रालयका प्रशासन महाशाखा प्रमुख विजय राईका अनुसार पर्यटन कार्यालय धरान र काकडभिट्टामा ७–७ जना, पर्यटन विकास आयोजनामा १५ जना र इकाइमा १० जना कर्मचारीको दरबन्दी स्वीकृत भएको हो । स्वीकृत भएको दरबन्दी कार्यालय सहयोगीदेखि ९ औं तहसम्मको छ । कार्यालयमा कार्यालय प्रमुख र लेखा स्थायी दरबन्दीबाट जानन्छन् । केही प्राविधि पनि स्थायी दरबन्दीबाट लगिएको छ । बाँकी जनशक्ती अस्थायी दरबन्दीबाट पदपुर्ती हुँदै आएको छ ।

कोशी प्रदेश सरकारकी प्रमुख सचिव चन्द्रकला पौडेलका अनसार प्रदेशको स्वीकृत दरबन्दी अनुसार कार्यरत रहेका कर्मचारीको नियुक्तीका लागि दरबन्दी स्वीकृत गरिएको हो । संघले परिपत्र गरेपनि अतिआवश्यक कार्यालय भएका कारण दरबन्दी स्वीकृत गरेको उनको भनाई छ । ‘कार्यालयहरु छन्, अघिल्लो वर्षकै दरबन्दी हो,’ उनले भनिन्,‘ केही नयाँ थप गरिएको होइन्, गत वर्ष भएकैको कन्टीनियुटी (निरन्तरता) हो ।’

उनका अनुसार प्रदेशमा दरबन्दी अनुसार काम गर्ने पर्याप्त जनशक्ती छैनन् ।