विश्वकप लिग २ मा युएईसँग नेपाल पराजित

काठमाडौं । आईसीसी क्रिकेट विश्वकप लिग–२ काे खेलमा  नेपाल युनाइटेड अरब इमिरेट्स (यूएई)सँग पराजित भएको छ ।

आज भएको खेलमा नेपाल यूएईसँग पाँच विकेटले हारेको हो ।

नेपालले दिएको २३४ रनको लक्ष्य यूएईले ४३.३ ओभरमा पाँच विकेट गुमाएर पूरा गर्‍यो ।

यूएईको जितमा ओपनर आर्यांश शर्माले सर्वाधिक ९८ रनको महत्त्वपूर्ण पारी खेले । कुल ९८ बलको सामना गरेका शर्मा शतक बनाउनबाट दुई रनबाट चुके । उनलाई नेपालका स्पिनर सन्दीप लामिछानेले आउट गरेका थिए ।

अर्का ओपनर अलिशान शराफुले २६ बलमा आक्रामक ४५ रन जोडे । उनलाई करण केसीले आउट गरेका थिए ।

मध्यक्रममा राहुल चोपडा १५ रन बनाएर आउट भए । मुहम्मद वसिमले ४६ बलमा २६ रनको योगदान दिए ।

नेपालको बलिङतर्फ सन्दीप लामिछानेले १० ओभरको स्पेलमा ३४ रन खर्चेर दुई महत्त्वपूर्ण विकेट लिएका थिए । लामिछाने बाहेक करण केसी र दीपेन्द्र सिंह ऐरीले समान एक–एक विकेट हात पारे । टस जितेर पहिलो व्याटिङ गरेकाे नेपालले कप्तान राेहित पाैडेलकाे १०९ रनकाे मद्दतमा २३३ रन बनाएको थियोे ।