नेपालपछि माडागास्करमा जेनजी आन्दोलन, राष्ट्रपतिले देश छाडे

काठमाडौं । जेनजी आन्दोलनले नेपालमा सत्ता परिवर्तन गरेकाे एक महिनापछि हिन्द महासागरको पूर्वी तटमा रहेकाे अफ्रिकी टापु देश माडागास्करमा पनि जेनजी आन्दोलन उग्र बनेकाे  छ ।

जेनजी युवाहरूको उग्र विरोध–प्रदर्शनपछि त्यहाँका राष्ट्रपति आन्द्रे राजोएलिना देश छाडेर भागेका छन् । पानी र बिजुली अभावमा आन्दोलन चर्किएपछि राष्ट्रपतिले देश छाडेका हुन् ।

राजोएलिनाले एक दिनअघि आइतबार सेनाको सहयोगमा देशमा ‘कू’ को प्रयास भइरहेको दाबी गरेका थिए ।

रेडियो फ्रान्स इन्टरनेसनलका अनुसार, फ्रान्सेली राष्ट्रपति इमानुएल म्याक्रोनको अनुरोधमा आइतबार एक फ्रान्सेली सैन्य विमानले राष्ट्रपति आन्द्रे राजोएलिनालाई त्यहाँबाट सुरक्षित रूपमा निकालेका हाे ।

यसअघि माडागास्करस्थित फ्रान्सेली दूतावासले आफ्नो पूर्वउपनिवेशमा कुनै पनि सैन्य हस्तक्षेपबाट इन्कार गरेको थियो ।

ब्लुमबर्गको रिपोर्टमा फ्रान्सको राष्ट्रपति कार्यालय र विदेश मन्त्रालयले यसमा टिप्पणीका लागि गरिएको अनुरोधको तत्काल कुनै जवाफ नदिएको भनिएको छ ।