माेरङकाे कटहरीमा महिलाले काटिदिइन् पुरुषको लिङ्ग

विराटनगर । मोरङको कटहरी गाउँपालिका–२ आदर्श टोलमा एक जना पुरुषको लिङ्ग काटिएको छ । सोमबार बेलुका करिब ५ बजे महिला साथीलाई भेट्न गएका ३२ वर्षीय कामत थरका पुरुषको  लिङ्ग काटिएको हो ।

प्रहरीका अनुसार धारिलाे हतियार दाउले लिङ्ग काटिएका पुरुषको नोबेल मेडिकल कलेजमा उपचार भइरहेको  छ ।  लिङ्गमा धारिलो हतियार प्रयोग गरेका कारण गम्भीर चोट छ । उनको आइसियूमा उपचार भइरहेको छ । महिलालाई प्रहरीले नियन्त्रणमा लिएकाे छ ।

घाइते पुरुषको उपचारका लागि नोबेल मेडिकल कलेज पुगेका आफन्तका अनुसार पनि पुरुषको लिङ्गमा गहिरो चोट छ ।

ती आफन्तका अनुसार घाइते पुरुषको घर जहदा गाउँपालिका– ३ मा पर्छ । सोही वडाकी महिला कटहरीको आदर्श टोलमा बस्दै आएकी थिइन् । साेमबार बेलुका घाइते पुरुष ति महिलाकाे डेरामा गएका थिए । आफन्तकाे दाबी अनुसार महिलाले अरुको पनि सहयोग लिएर लिंग काटेका थिए । तर, प्रहरीले पुष्टि गरेकाे छैन ।

प्रहरी स्रोतका अनुसार विवाहहेतर सम्बन्धका कारण घटना भएको देखिन्छ ।  उनीहरुबीच के विषयमा विवाद थियाे भन्ने खुलेकाे छैन । घटनापछि प्रहरीले महिलालाई नियन्त्रणमा लिएर अनुसन्धान गरिरहेकाे छ । प्रहरीका अनुसार घटनापछि आराेपी महिला बेहाेस भएकी थिइन् । उनलाई काेशी अस्पतालमा सामान्य उपचार पछि प्रहरीले अनुसन्धानका लागि नियन्त्रणमा लिएकाे हाे ।

मोरङ प्रहरी प्रमुख कवित कटवालका अनुसार प्रहरी टाेलीले घटनाको अनुसन्धान गरिरहेकाे छ ।