विपिन जोशीको मृत्यु पुष्टि, शव इजरायललाई बुझाउने

काठमाडौं । इसरायल–हमासको युद्धमा बन्धक बनाइएका नेपाली युवक विपिन जोशीको मृत्‍यु पुष्टि गरेको छ । हमासले उनको मृत्यु पुष्टि गरेको हो । हमासले आजै जोशीसहित चारजना बन्धकको शव इजरायललाई बुझाउने छ ।

बीबीसीका अनुसार हमासको सैन्य शाखाले नेपालका विपिनसहित चार जना बन्धकहरूको नाम सार्वजनिक गरेको छ । उनीहरुको शव आजै बुझाउने बीबीसीले जनाएको छ ।

हमासले इ इलौज,योस्सी शराबी,विपिन जोशी, डानियल पेरेत्सको शव बुझाउनेछ । हमासले आजै जिवित २० जनाहरुलाई मुक्त गरेको थियो ।

अध्ययनको सिलसिलामा इजरायल पुगेका कञ्चनपुरका विपिन जोशी सन् २०२३ अक्टुबर ७ मा हमासले किबुत्ज क्षेत्रमा गरेको आक्रमणको क्रममा बन्धक बनाइएका थिए । सो आक्रमणको क्रममा १० जना नेपाली विद्यार्थीहरु मारिएका थिए । हमास लडाकुहरुले विपिनलाई आफूसँगै लिएर गएका थिए ।

सन् २०२३ नोभेम्बर १७ मा विपिन गाजा क्षेत्रको अल शिफा अस्पतालमा देखिएका थिए । तर त्यसपछि उनको अवस्था अज्ञात थियो । गत बुधबार बेलुका विपिनको एउटा पुरानो भिडियो सार्वजनिक गरिएको थियो ।