दमकबाट लुटिएको प्रहरीको एउटा हतियार भेटियो

झापा । जेनजी आन्दोलनका क्रममा अराजक समूहले झापाको दमकबाट लुटेको एउटा राइफल आइतबार बिहान फेला परेको छ । इलाका प्रहरी कार्यालय दमकबाट लुटिएको म्यागजिनसहितको ३०३ मार्क ३ राइफल भेटिएको हो ।

झापा प्रहरीका प्रवक्ता डीएसपी खगेन्द्रबहादुर खड्काका अनुसार दमक नगरपालिका–५ स्थित धनेश्वर मन्दिरनजिक बेवारिसे अवस्थामा बन्दुक भेटिएको हो ।

उक्त राइफल जेनजीको हिंसात्मक आन्दोलनका क्रममा भदौ २४ गते इलाका प्रहरी कार्यालय दमकबाट लुटिएको थियो ।

जेनजी आन्दोलनका क्रममा झापामा प्रहरी साना तथा ठूला गरेर २३ थान हतियार लुटिएको थियो । ती मध्ये एउटा फेला परेको हो । प्रहरी स्रोतका अनुसार २३ थान हतियार, १ सय ८० सेल अश्रुग्यास र ५ हजार ६ सय ९० राउण्ड गोली भेटिएका छैनन् ।

दमकबाट लुटिएकामध्ये ५५ राउण्ड गोली कमल गाउँपालिका–७ रंगपुरस्थित केराबारीबाट शनिबार बरामद गरिएको थियो ।

प्रहरीबाट लुटिएका हतियार अझै बाहिरै रहेकाले सुरक्षा चुनौती बढेको छ । प्रहरीले हतियार बुझाउन बारम्बार आग्रह गरेको छ । तर, लुटपाटमा संलग्नले हतियार बुझाएका छैनन ।