लागूऔषध काराेबारीकाे अड्डामा प्रहरीको छापा : हतियार लुट्ने ‘जेन्जी’सहित ८ जना पक्राउ

विराटनगर । झापामा  प्रहरीको हतियार लुट्ने र हिरासतबाट भागेका दुईसहित ८ जना लागूऔषध काराेबारी  पक्राउ परेका छन् ।

शनिबार साँझ दमक नगरपालिका–३ वेलडाँगीस्थित भुटानी शरणार्थी शिविरकाे सेक्टर ए ३ हट नं. ३५३ मा छापा मारेकाे प्रहरीले जेन्जी आन्दोलनका बेला इलाका प्रहरी कार्यालय दमकबाट  हतियार लुट्ने र इलाका प्रहरी कार्यालय उर्लाबारीकाे हिरासतबाट भागेका थुनुवासहित  आठ जनालाई ७ ग्राम ८०० मिलिग्राम खैरो हिरोइनसहित पक्राउ गरेकाे हाे ।

लागुऔषध बिक्री वितरण भइरहेको भन्ने गोप्य सूचनाका आधारमा प्रहरीले छापा मारेकाे थियो ।

घरधनी  दमक–३ वेलडाँगी भुटानी शरणार्थी शिविरका साजन थापा (२७), इलाम चुलाचुली–३ का दिपेश तामाङ (३२) र सनम राई (३२), दमक–३ का आदित्य लिम्बू (१८), पविन विश्वकर्मा (१९) र सुचन दर्जी (२५), वेलडाँगी भुटानी शिविरका बिजय माझी (२५) र  मोरङ मिक्लाजुङ–८ का निश्चल पोर्तेललाई प्रहरीले पक्राउ गरेकाे हाे ।

पक्राउ परेकामध्ये आदित्य लिम्बू ‘जेन्जी आन्दोलन’का क्रममा २४  भदौमा इलाका प्रहरी कार्यालय दमकबाट प्रहरीको हतियार लुट्ने घटनामा संलग्न रहेको जिल्ला प्रहरी कार्यालय झापका प्रवक्ता डिएसपी खगेन्द्रबहादुर खड्काले जानकारी दिए ।

उनका अनुसार मोरङ मिक्लाजुङ–८ का निश्चल पोर्तेल गत भदौ २४ गते इलाका प्रहरी कार्यालय उर्लाबारीकाे  हिरासतबाट फरार रहेका व्यक्ति हुन् । त्यसबेला उनी लागूऔषध मुद्दाकाे अनुसन्धानका लागि हिरासतमा थिए ।

घरको कोठा तलासी गर्दा चस्माको खोलभित्र लुकाइछिपाइ राखिएको अवस्थामा लागुऔषध खैरो हिरोइन फेला परेको प्रहरीले जनाएको छ ।

बरामद लागुऔषध र पक्राउ परेकामाथि थप अनुसन्धान भइरहेको प्रहरीले जनाएको छ ।