मेची राजमार्गको ठाउँठाउँमा पहिरो, यातायात खुल्ने अनिश्चित

विराटनगर । अविरल वर्षासँगै आएको बाढी र पहिरोका कारण कोशी प्रदेशको लाइफाइन मानिएको मेची राजमार्ग अवरुद्ध छ ।

झापाको चारआलीदेखि ताप्लेजुङसम्म जोड्ने करिब २६८ किलोमिटर लामो यो राजमार्ग अवरुद्ध हुँदा पहाडी जिल्लामा हुने आपूर्ति तथा ढुवानी ठप्प भएको छ ।

सडक डिभिजन कार्यालय इलामका अनुसार, क्षतिग्रस्त खण्डहरू मर्मत गर्न अब कम्तीमा एक साता लाग्ने अनुमान छ भने यसबाट करिब २ अर्ब रुपैयाँ बराबरको भौतिक क्षति पुगेको प्रारम्भिक अनुमान गरिएको छ ।

लामो दूरीको वैकल्पिक मार्ग धरान–धनकुटा–म्याङ्लुङ–फिदिम प्रयोगमा ल्याइएको छ । यो सडकले पाँचथर र ताप्लेजुङलाई राहत मिलेको छ । तर, इलामका लागि विकल्पमा सडक सञ्जाल तयार भएको छैन । जसले गर्दा सवारी आवागमन प्रभावित भएको सडक डिभिजन इलामका प्रमुख तथा सिनियर डिभिजनल इन्जिनियर पवन भट्टराईले बताए ।

उनका अनुसार मेची राजमार्गअन्तर्गत इलामको माइखोला खण्डस्थित राजदुवालीमा बुधबारदेखि मर्मत सुरु भएको छ ।

‘यात्रुका माइखोलाबाट करिब डेढ किलोमिटर हिँडेर इलामबाट आउने सवारी साधनहरूमा चढ्ने व्यवस्था मिलाइएको छ ।

इन्जिनियर भट्टराईका अनुसार यो खण्ड सञ्चालनमा आउन कम्तीमा एक साता लाग्ने देखिएको छ । उक्त स्थानको मर्मतका लागि भुगर्भविद् ल्याएर अध्ययन गरी मर्मत थालिएको छ ।

समग्र मेची राजमार्ग पूर्ण रूपमा कहिलेसम्म सञ्चालनमा आउँछ भन्ने यकिन हुन सकेको छैन ।

सडक विभागले सार्वजनिक गरेको विवरणअनुसार मेची राजमार्गमा बाढीका कारण मेची राजमार्गको जोरकलास भन्ने स्थानमा एक हजार मिटर सडक क्षति पुगेको छ ।

फिक्कल गोदाकमा ८ सय, गोदाक माइखोलामा २ हजार मिटर, माइखोला राजदुवालीमा १ हजार ७ सय मिटर, इलाम धोवीधारामा १५ मिटर, धोवीधारा नेपालटार ५ हजार ९ सय मिटर, नेपालटार राँकेमा ६ हजार मिटर, राँके फिदिममा ४ हजार ५ सय मिटर सडकमा क्षति पुगेको छ । यो सडक क्षतिग्रस्त हुँदा २ अर्ब ३५ करोड ७० लाख रुपैयाँ बराबर क्षति पुगेको अनुमान छ । मेची राजमार्गको पुनर्निर्माणका लागि करिब डेढ अर्ब रुपैयाँ लाग्ने अनुमान छ ।

माइखोला पुलको फाउन्डेसन बगाउँदा ८ करोड बराबर क्षति भएको अनुमान छ । साथै उक्त स्थानमा सिङ्गल स्पानको ८० मिटर लामो स्थायी पुल निर्माणका लागि पनि ४० करोड आवश्यक रहेको जनाएको छ ।

हेवा खोलामा सिङ्गल स्पानको ८० मिटर लामो पक्की पुल निर्माणका लागि ४२ करोड आवश्यक रहेको सडक विभागले जनाएको छ ।