विपिन जोशीको पुरानो भिडियो सार्वजनिक भयो, अवस्था अझै अज्ञात

काठमाडौं । इजरायल र हमासबीच युद्धविराम सहमतिअघि बुधबार हमासले बन्धक बनाएका नेपाली युवक विपिन जोशीको भिडियो फुटेज सार्वजनिक भयो । पुरानो भिडियो सार्वजनिक भएपनि उनको अवस्था अझै अज्ञात छ ।

इजरायलका लागि नेपाली राजदूत धनप्रसाद पण्डितका अनुसार उनको अवस्थाका बारेमा स्पष्ट जानकारी आइसकेको छैन । विपिनको अवस्था बुझ्ने कोसिस भइरहेको उनले बताए । ‘विपिनको बारे धेरैले सोधिरहनु भएको छ तर, अहिलेसम्म उनको जीवनको बारेमा केही जानकारी छैन,’ उनले भने ।

अध्ययनको सिलसिलामा इजरायल पुगेका कञ्चनपुरका विपिन जोशीलाई दुई वर्षअघि हमासले किबुत्ज क्षेत्रमा गरेको आक्रमणको क्रममा बन्धक बनाएकाे थियाे । सो आक्रमणको क्रममा १० जना नेपाली विद्यार्थीकाे मृत्यु भएकाे थियाे । हमास लडाकुहरुले विपिनलाई आफूसँगै लिएर गएपछि उनको अवस्था हालसम्म अज्ञात छ ।

बुधबार साँझ भने उनकाे ३३ सेकेन्डको पुरानो भिडियो सार्वजनिक भएकाे थियाे । जहाँ विपिनले आफ्नो परिचय दिँदै आफू नेपाली नागरिक भएको बताएका छन् र ‘अर्न एण्ड लर्न’ कार्यक्रमको सिलसिलामा इजरायल आएको बताएका छन् ।