विराटनगरको बस्तीमा पस्यो केशलिया र सिंघिया खोलाको बाढी

विराटनगर । अविरल वर्षासँगै केशलिया र सिंघिया खोलामा आएको बाढी बस्तीमा पसेको छ ।

केशलीया खोला बस्तीमा विराटनगरमा करिब १०० परिवार विस्थापित भएका छन् । सिंघिया खोलामा आएको बाढीले ११ परिवार विस्थापित भएका छन् ।

विराटनगर महानगरपालिका– ६ र १२ नम्बर वडामा केशलीया खोला किनारका बासिन्दा विस्थापित भएका हुन् ।

विराटनगर–१२ मा सम्पन्न बस्तीका ७५ घरका ३५० जना विस्थापित भएका छन् । उनीहरुलाई बखरी आधारभूत विद्यालय, दरैया आधारभूत विद्यालयमा सारिएको छ ।

बाढी बस्तीमा पसेपछि मानिसहरूलाई विद्यालय तथा नजिकको उद्योगमा सारिएको प्रमुख जिल्ला अधिकारी इन्द्रदेव यादवले बताए ।

विराटनगर ६ का केही घरमा पानी पसेपछि स्थानीय विस्थापित भएका छन् ।

विराटनगर महानगरपालिका– ८ को सुकुम्बासी बस्तीमा सिंगियाको बाढी पसेपछि ११ परिवारलाई सुरक्षित स्थानमा सारिएको छ ।

सुनबर्षी नगरपालिका –३ बाहुनटोलमा बक्राहा खोलाले बाध काटेर बस्तीमा पसेको छ । प्रहरीका अनुसार बाध फुटाएर खोला बस्तीमा पस्दा ६० घरमा बाढीको पानी पसेको छ ।

सुनवर्षी नगरपालिका– ६ मा बक्राहा खोलाले बाध भत्काएको छ । खोलाको बाँध मर्मत भइरहेको छ । मोरङको उर्लावारी –९ मा रतुवा खोलाको पानी पस्दा २० परिवार विस्थापित भएका छन् ।

मोरङको रतुवामाई नगरपालिका– ५ मा कट्नु खोला बस्तीमा पस्दा ६ परिवार विस्थापित भएका छन् ।

रतुवामाई नगरपालिका– ५ महाराज थानमा बक्राहा खोला बस्तीमा पस्दा ९ परिवार विस्थापित भएका छन् । सोही वडाको मुसरभिट्टामा बाढी पस्दा ३० परिवार विस्थापित भएका छन् ।