दाताको सहयोगमा उठ्दैछ मोरङ प्रशासन, सेवा प्रवाह दसैँपछि

विराटनगर । जेनजी आन्दोलनका क्रममा अराजक समूहले आगजनी गर्दा ध्वस्त भएको जिल्ला प्रशासन कार्यालय मोरङको प्रशासनिक भवन मर्मत भइरहेको छ । कार्यालय सञ्चालनका लागि आवश्यक सामग्री जुटाउने काम पनि जारी छ ।

माेरङका प्रमुख जिल्ला अधिकारी इन्द्रदेव यादवका अनुसार कार्यालय मर्मत र सामग्री जुटाउन राज्यकोषको बजेट खर्च भएको छैन, विभिन्न संघसंस्थाले सहयोग गरिरहेका छन् ।

कार्यालयमा आगजनी भएका कारण यादव कार्यालय परिसरमै रहेको सटरमा कार्यकक्ष बनाएर बसेका छन् ।

उनका अनुसार आगजनी र लुटपाटबाट जिल्ला प्रशासन कार्यालयका केही सामग्री बाँकी छैन । ‘कार्यालयमा केही सामग्री छैन, लुटपाट र आगजनी भयो,’ उनले भने, ‘लुटिएकोमध्ये एउटा प्रिन्टर फिर्ता आएको छ ।’

कार्यालय सञ्चालनका लागि विभिन्न संघसंस्थाले कम्युटर, प्रिन्टर, टेबल, कुर्सीलगायत संरचना जुटाइदिएका छन् ।

बिहीबार जीवन विकास लघुवित्त वित्तीय संस्थाले तीन वटा कलर प्रिन्टर सहयोग गरेको छ । जीवन विकासका नायव प्रमुख कार्यकारी अधिकृत दामोदर रेग्मीले प्रमुख जिल्ला अधिकारी यादवलाई प्रिन्टर हस्तान्तरण गरे ।

यसअघि नेपाल उद्योग वाणिज्य संघ कोशी प्रदेशले १० वटा कम्युटर सहयोग गरेको थियो । निर्माण व्यावसायी संघले कार्यालय मर्मत गर्दैछ । राष्ट्रिय परिचयपत्र वितरणका लागि छुट्टै टहरा पनि संघले निर्माण गर्दैछ । इँटा व्यावसायी संघले २१ वटा टेबुल-कुर्सी सहयोग गरेको छ ।

यसैगरी सुनौलो पूर्व नेपाल यातायात व्यावसायी संघले पंखा, मदिरा व्यावसायी संघले कुर्सी सहयोग गरेको छ । रङरोगनका लागि एसियन पेन्टसले रङ दिएको छ । रङरोगनको लागत उद्योग वाणिज्य महासंघले ब्यहोर्ने बताएको छ ।

कार्यालयको नेटवर्किङ कम्युटर एसोसिएसनले गर्दैछ । अन्य संघसंस्थाले पनि सहयोग गरेका छन् । थप सहयोगको आश्वासन पनि आएको छ । कार्यालयका लागि आवश्यक सामग्री संघसंस्थाको जुटाउने काम भइरहको यादवले बताए । तत्काल सेवा प्रवाहका लागि १२ थान कम्युटर, ५ थान प्रिन्टर र टेबल-कुर्सी सहयोग आएको उनले बताए ।

जिल्ला प्रशासन कार्यालयमा नागरिकता वितरण, राष्ट्रिय परिचयत्रपत्र र राहदानीको काम रोकिएको छ । दसैँपछि मात्रै पूर्णसेवा प्रवाह गर्ने तयारी छ । अहिले अत्यावश्यक सेवा प्रवाह भइरहेकाे छ ।