हुलाक निर्देशनालय : भवन जाेगियाे, जाेगिएन चिठीपत्र

विराटनगर । जिल्ला प्रशासन कार्यालय मोरङको अगाडि छ, प्रादेशिक हुलाक निर्देशनालय विराटनगर ।

जेनजी आन्दोलनका क्रममा गत भदौ २४ गते अराजक समूहको निशानामा हुलाक कार्यालय पनि पर्याे । आगजनीबाट खरानी भएको जिल्ला प्रशासन कार्यालयमा दिनहुँ सहयोगका लागि दाताहरु पुग्छन् । प्रशासन कार्यालय अगाडि रहेको हुलाकमा भने कसैको नजर परेको छैन ।

निमित्त कार्यालय प्रमुख विष्णुबहादुर बुढाथोकीका अनुसार कार्यालयका सबै सामग्री जलेर खरानी भएको छ । धुवाको मुस्लोले कालो भएको भित्ता र केही फर्निचर बाहेक केही बचेको छैन ।

‘हाम्रो कार्यालयमा केही बाँकी छैन, धेरै जले, नजलेका सामग्री लुटपाट भयो,’ बुढाथोकीले भने,‘ हुलाकले कसैको केही बिगारेको थिएन, आगजनी गर्दा केही बचेन ।’
उनका अनुसार कार्यालयको सरसफाइ र सहानुभूति दिनका लागि कार्यालयमा कोही पुगेनन् ।

‘कार्यालयकै कर्मचारीले हुलाक कार्यालय सफा गर्दैैछौं,’उनले भने,‘ तत्काल सेवा सुरु गर्न सक्ने अवस्थामा छैनौं ।’

हुलाक कुनै समय चिठीपत्र मार्फत खबर आदानप्रदान गर्ने प्रमुख माध्यम थियो । प्रविधिको विकाससँगै हुलाकमा चाप घटेपनि सरकारी चिट्ठी पत्र, देश विदेशबाट पार्सल पठाउनका लागि हुलाक भरपर्दाे माध्ययम हो । पत्रपत्रिकाको काम पनि हुलाकबाटै हुन्छ ।

उनका अनुसार विदेशबाट आएका करिब १५० वटा पार्सल जलेर नष्ट भएको छ । सरकारी र व्यक्तीगत चिट्ठी पत्रहरु सबै जलेको छ । चिट्ठी पत्रको रेकर्ड पनि जलेको छ ।
हुलाक कार्यालयमा भएको गाडी र निजी मोटरसाइकल जलेका छन् । कम्युटर, प्रिन्टर, ल्यापटप, चिट्ठी पत्र राख्ने दसाज पनि जलेको छ । आगोले नभटेका सामग्री लुटपाट भएको थियो ।

‘दसैँ अघि कार्यालय सञ्चालन गर्न सक्ने अवस्था छैन, हामीसँग एउटा कम्युटर पनि बचेन,’ उनले भने,‘काम सुरु गर्नका लागि झापा र सुनसरीको हुलाकबाट १–१ वटा कम्युटर मगाएका छौं ।’

आगजनीबाट कार्यालयको १ करोड २५ लाख बराबरको भौतिक क्षति भएको छ । वर्षाैदेखिका कागजात र चिठीपत्र पनि जलेका छन् । जसको क्षतिको मूल्याङ्कन रुपैयाँमा हुननक्सने उनले बताए ।