विराटनगरमा महिलामाथि एसिड प्रहार

विराटनगर । विराटनगर महानगरपालिका–९ मा एक व्यक्तीले भाउजुमाथि एसिड प्रहार गरेका छन् । स्थानीय २५ वर्षीय छोटु भनिने श्रवण साहले २२ वर्षीय भाउजु रागिनीदेवी साहमाथि एसिड प्रहार गरेका हुन् ।

प्रहरीका अनुसार घटना सोमबारको हो । एसिड प्रहारबाट घाइते महिलाको न्यूरो अस्पताल विराटनगरमा उपचार भइरहेको छ । उनको अवस्था खतरामुक्त छ ।

प्रहरीका अनुसार भाउजुमाथि प्रहार गर्नका लागि देवरले वियरको बोतलमा एसिड लिएर आएका थिए । दाजु घरमा नभएको मौकामा उनले भाउजुमाथि एसिड प्रहार गरेका थिए । अनुहारमा प्रहार गरेको एसिड रोक्ने क्रममा महिलाको हात र शरीरका अन्य भागमा लागेको छ । उनले लगाएको सल एसिडले जलेको थियो ।

प्रहरीको प्रारम्भिक अनुसन्धानका क्रममा लेनदेन विवादमा महिलामाथि एसिड प्रहार भएको खुलेको छ ।

मोरङ प्रहरीकी प्रवक्ता, डिएसपी कोपिला चुँडालले एसिड प्रहार गर्ने साहको खोजी  भइरहेकाे बताइन् । घरायसी विवादमा एसिड प्रहार भएको बताउँदै उनले घाइते महिलाको अवस्था खतरामुक्त रहेको उनकाे भनाइ छ ।