लक्ष्मणले स्वीकारे रुवीकाे हत्या, जलेकाे अवस्थामा पक्राउ

रौतहट । रौतहटमा सुटकेसभित्र राखिएको अवस्थामा मृत फेला परेकी रुवी साहको हत्या आरोपी शरीर जलेको अवस्थामा फेला परेका छन् ।

साहको हत्या आरोपमा लक्ष्मण पासवान माथि छ । प्रहरीको खोजी सूचीमा रहेका उनी बुधबार बिहान रौतहटको माधवनारायण नगरपालिका–६ माधोपुरको पश्चिमतर्फको बाटोमा जलेर घाइते भएको अवस्थामा फेला परेका हुन् ।

पासवानले पनि आफूले रुवीको हत्या गरेको स्वीकार गरेका छन् । उनले आफ्नो शरीरमा रुवीको तस्बिर ट्याटु खोपेका थिए । हातमा रुवीको नाम पनि लेखेका थिए ।

पासवानले आफ्नो शरीरमा आगो लगाउनु अघि भिडियो बनाएर फेसबुकमा पोष्ट गरेका छन् । सो भिडियोमा उनले रुवीको हत्या आफूले नै गरेको स्वीकार गरेका छन् ।

रुवीलाई हत्या गरेदेखि आफ्नो हात काँपिरहेको बताएका उनले रुवी मरिसकेपछि आफू बाँचेर के गर्नु भन्ने लागेको बताएका छन् ।

‘रुवीलाई मारेदेखि मेरो हात काँपिरहेको छ । मेरो जान मरिसकेकी छन् । म बाँचेर के गर्नु । पक्राउ परे जेल जानुपर्छ । १०–१५ वर्ष सजाय भोग्नुपर्छ,’ उनले भिडियोमा भनेका छन् ।

उनले रुवीसँगको प्रेमसम्बन्धबारे पनि धेरै कुराहरु खुलाएका छन् । उनले हत्या अघि रुवी व्युटी पार्लरबाट आफ्नो कोठामा आएको र एकअर्का बिना बाँच्न नसक्ने सम्वाद भएको पनि खुलाएका छन् ।

उनलाई प्रहरीले उपचारका लागि अस्पताल पुर्‍याएको छ ।

गत शनिबार गौर बजार जान भनेर डेराबाट निस्किएकी रुवीको शव सुटकेसमा प्याक गरेको अवस्थामा भेटिएको थियो ।

जिल्ला प्रहरी कार्यालय रौतहटका एसपी नेत्रमणी गिरीका अनुसार हत्याका मुख्य आरोपी पासवानले आफ्नो शरीरमा आफैंले आगो लगाएको अवस्थामा भेटिएका हुन् ।