झापामा भ्यान र पिकअप दुर्घटना हुँदा एक जनाकाे मृत्यु, एकै परिवारका चार जना घाइते 

मंगलबार राति करिब साढे ८ बजे मे १ च ३४४० नम्बरको मारुती भ्यान र मे १ च ५४४६ नम्बरको बोलेरो पिकअप आपसमा ठोकिँदा दुर्घटना भएको हो । दुर्घटनामा परी मारुती भ्यानका चालक झापा शिवसताक्षी नगरपालिका– ७ का २९ वर्षीय नवराज बाँस्कोटाको मृत्यु भएको हो ।

दुर्घटनामा गम्भीर घाइते भएका उनलाई उपचारका लागि बीएण्डसी अस्पताल बिर्तामोड पुर्याउँदा चिकित्सकले मृत घोषणा गरेका थिए ।

सोही दुर्घटनामा शिवसताक्षी–७ का ४० वर्षीय पृथ्वीनाथ साह, उनकी श्रीमती ३७ वर्षीया पुनमदेवी साह, १४ वर्षीय छोरा प्रसन्न साह र ९ वर्षीया छोरी प्रिन्सा साह घाइते भएका छन् । उनीहरूको बीएन्डसी अस्पतालमा उपचार भइरहेको छ ।

बोलेरो चालक धनकुटा महालक्ष्मी–८ का २४ वर्षीय सुमन पौडेललाई नियन्त्रणमा लिएको जिल्ला प्रहरी कार्यालय झापाले जनाएकाे छ ।