किसानकाे आन्दाेलनपछि सरकारले निकासा गर्याे अनुदान

काठमाडौं । उखु किसानको आन्दोलनपछि सरकारले किसानलाई दिने भनेको अनुदान भुक्तानीका लागि बजेट निकासा गरेको छ । उखु किसानले गत आर्थिक वर्ष २०८१–८२ मा उखु बेचेबापत पाउनुपर्ने अनुदान भुक्तानी गर्न सरकारले ७५ करोड ४९ लाख रुपैयाँ निकासा गरेको हो ।

कृषि मन्त्रालयको प्रस्तावमा उक्त रकम ८ जिल्लाका कोष तथा लेखा नियन्त्रक कार्यालयमार्फत किसानसम्म पुर्‍याइने अर्थ मन्त्रालयका प्रवक्ता टंकप्रसाद पाण्डेले जानकारी दिए ।

किसानले प्रतिक्विन्टल ७० रुपैयाँको दरले अनुदान पाउनुपर्ने माग गर्दै लामो समयदेखि आन्दोलन गरिरहेका छन् । तर, सरकारले प्रतिक्विन्टल ३५ रुपैयाँको दर लागू गर्दै निकासा गरेको रकम किसानको अपेक्षाभन्दा आधा मात्र हो ।

गत आव २०८१/८२ को बजेटमा उखु खेती प्रवर्द्धनका लागि किसानलाई प्रोत्साहन गर्न २ अर्ब २५ करोड रुपैयाँ विनियोजन गरिएको थियो । तर, सरकारले स्रोत अभाव भएको भन्दै किसानलाई दिने भनेर विनियोजन गरेको रकम पनि घटाइदिएको हो ।