लेटाङमा बजारबाट घर फर्कदै गरेका दुई जनालाई खोलाले बगायो

विराटनगर । मोरङको लेटाङमा बजारबाट घर फर्कदै गरेका दुई जनालाई चिसाङ खोलाले बगाएको छ ।

बुधबार साँझ लेटाङ नगरपालिका–१ अमलबोटेका अन्दाजी ७५ वर्षीय बुद्धवीर तामाङ र लेटाङ– २ किराँत चोकका ५० वर्षीय च्याङ्बा भनिने टिंके घिसिङलाई चिसाङ खोलाले बगाएको हो ।

लेटाङ बजारबाट घरतर्फ फर्किने क्रममा लेटाङ–६ लामिटारस्थित बगुवा भन्ने ठाउँबाट साझ साढे ५ बजे खाेलाले उनीहरुलाई बगाएको थियो ।

मोरङ प्रहरीका डीएसपी हस्तबहादुर सुनुवारका अनुसार करिब ८ सय मिटर बगाएको अवस्थामा बुद्धवीरको शव फेला परेको थियो । घिसिङको शव करिब ९ सय मिटर तल खोलाको बीच भागमा फेला परेको थियो ।

प्रहरीका अनुसार उनीहरु खोलामासँगै तर्दै थिए । बहाव सामान्य बढेको खोलाले दुवैलाई बगाएको थियो । मृतककाे शव पाेष्टमार्टमका लागि वीपी काेइराला स्वास्थ्य विज्ञान प्रतिष्ठान धरान पठाएकाे प्रहरीले बताएकाे छ ।