क्रिकेटर ललित राजवंशीको घर सांसद अर्यालले बनाइ दिने

विराटनगर । नेपाली राष्ट्रिय क्रिकेट टिमका खेलाडी ललित राजवंशीको जीर्ण अवस्थामा रहेको घर प्रदेश सांसद अमृत अर्यालले बनाइदिने घोषणा गरेका छन् ।

कोशी प्रदेशका सांसद अर्यालले राजवंशीको विराटनगर महानगरपालिका–१४ स्थित फुस्को घर निर्माण गरिदिने घोषणा गरेका हुन् ।

मातृशोकमा परेका क्रिकेटर राजवंशीलाई समवेदना दिन सोमबार उनको निवास पुगेका सांसद अर्यालले जीर्ण घरको अवस्था देखेर बनाइदिने घोषणा गरेको बताए ।
उनले प्रदेश सरकारको जनता आवास कार्यक्रम अन्तर्गत राजवंशीको घर निर्माण गरिने बताए । यो घोषणालाई क्रिकेटर राजवंशीले स्वीकार गरेका थिए ।

सांसद अर्यालका अनुसार, कोशी प्रदेशमा प्रत्यक्ष निर्वाचित सांसदको सिफारिसमा निर्वाचन क्षेत्रमा ६ अति विपन्न परिवारका लागि घर निर्माण मिल्छ । सोही कार्यक्रमअन्तर्गत एउटा घर क्रिकेटर राजवंशीको सम्मानमा निर्माण गर्न लागिएको हो ।

‘उहाँको घर फुस्को र जीर्ण छ, उहाँको सम्मानमा घर बनाउन लागिएको हो,’ सांसद अर्यालले भने ।

जनता आवास कार्यक्रमअन्तर्गत निर्माण हुने घर करिब चारदेखि पाँच लाख रुपैयाँको लागतमा बन्नेछ । जसमा दुईवटा कोठा, एउटा बरन्डा र शौचालय रहनेछ ।

पूर्वाधार विकास कार्यालयमार्फत निर्माण हुने यो घर यसै आर्थिक वर्षभित्र सम्पन्न गर्ने तयारी रहेको सांसद अर्यालले जानकारी दिए ।