रवि लामिछानेलाई राखिएको कोठाको झ्याल पनि बन्द

बुटवल । राष्ट्रिय मानवअधिकार आयोगका प्रतिनिधिले रुपन्देही कारागारको अनुगमन गरेको छ । राष्ट्रिय स्वतन्त्र पार्टी (रास्वपा) सभापति रवि लामिछानेलाई राखिएको कारागारको सोमबार आयोगले अनुगमन गरेको हो ।

अनुगमनका क्रममा लामिछानेलाई बन्द कोठामा राखेको पाइएको थियो । वातानुकूलित नरहेको र झ्याल प्लाई उडले टालेर बन्द गरिएको आयोगले जनाएको छ । रविलाई न्यूनतम सुविधा पनि नदिएको समाचार सार्वजनिक भएपछि वातानुकूलित कोठा रहेको एउटा पक्षको दाबी थियो । सोमबार आयोग पुग्दा बन्द कोठामा राखिएको देखिएको थियो ।

राष्ट्रिय मानवअधिकार आयोगकी प्रवक्ता लिली थापाले क्षमताभन्दा अत्यधिक संख्यामा कैदी बन्दी राखिएको,कारागारभित्र पर्याप्त शौचालय नरहेको र भएका शौचालयको अवस्था पनि राम्रो नभएको बताइन् । रविलाई राखिएको ब्लकभित्र झ्याल टालिएकाले राम्ररी हावा पास हुने अवस्था नदेखिएको उनले बताइन् ।  कोठामा दुई ओटा पंखा रहेको उनले जानकारी दिइन् ।

जेल प्रशासनले सुरक्षाका लागि झ्याल टालिएको बताएको थापाले बताइन् । आफूहरू झ्याल खोल्न भनेपछि कारागार प्रशासन खोल्न तयार भएको थापाले बताइन् ।