सुनसरीमा बस र माइक्रो ठोक्कियो, चार जनाको मृत्यु

विराटनगर । पूर्व–पश्चिम राजमार्गअन्तर्गत सुनसरी खण्डमा बस र विङ्गर माइक्रो ठोक्किएर दुर्घटना हुँदा ४ जनाको मृत्यु भएको छ ।

भोक्राहा–नरसिंह गाउँपालिका–३ जलुवा टोलमा झापाको काँकडभिट्टाबाट खोटाङको दिक्तेलतर्फ जाँदै गरेको मे १ ख १७९९ नम्बरको बस र विपरीत दिशाबाट आउँदै गरेको प्रदेश २–०१–००१ ज ००४७ नम्बरको विङ्गर माइक्रो एकआपसमा ठोक्किएर सोमबार दुर्घटना भएको हो ।

दुर्घटनामा परेर ४ जनाको मृत्यु भएको कोशी प्रदेशका निमित्त ट्राफिक प्रहरी प्रमुख डीएसपी सन्तोष श्रेष्ठले बताए ।

दुर्घटनामा १६ जना घाइते भएका छन् । विराटनगर र सुनसरीका विभिन्न अस्पतालमा उपचाररत घाइतेमध्ये ४ जनाको अवस्था गम्भीर रहेको प्रहरीले जनाएको छ ।

मृतक र घाइतेको पहिचान खुल्न बाँकी रहेको श्रेष्ठले बताए । बसका चालक झापाको अर्जुनधारा नगरपालिका–१ का ३६ वर्षीय गोपाल अधिकारीलाई प्रहरीले नियन्त्रणमा लिएको छ । विङ्गर चालक घाइते छन् ।