हुलाकी सडक : कटहरी खण्डकाे काम सुरु नगरे अनशन बस्ने भीम पराजुलीकाे घाेषणा

विराटनगर । हुलाकी सडकको कटहरीकाे रामचोक– हाटखोला खण्ड निर्माण तत्काल अघि नबढाए आमरण अनशन बस्ने नेपाली कांग्रेस कोशी प्रदेश सांसद भीम पराजुलीले  घोषणा गरेका छन् ।

राष्ट्रिय गाैरबकाे आयाेजना हुलाकी सडकको ६ किलोमिटर सडक निर्माण सुरु भएको ६ वर्षसम्म बनेको छैन । तत्काल कामअघि बढाउन माग गर्दै  पराजुलीले काम सुरु नभए प्रदेशसभा अगाडि आमरण अनशन बस्ने घोषणा गरेका हुन् ।

आइतबार कोशी प्रदेशसभा बैठकको शून्य समयमा बोल्दै उनले सरकार भन्दा ठेकेदार शक्तिशाली भएको गुनासो गरे ।

‘सरकार भन्दा बलिया ठेकेदार हुन कि के कति कारणले बाटो बनिरहेको छैन,’उनले भने,‘ यदि बाटो ठेकेदारले बनाएर भने ठेकेदारलाई कालो सूचीमा लिएर गएर नयाँ प्रक्रियाबाट जानु पर्छ भन्दा भएको छैन । किन भइरहेको छैन  ?’

सडक निर्माणका लागि प्रदेश सरकारलाई अग्रसरता लिन आग्रह गरे । ‘ संघको काम भनेर प्रदेश पन्छिन मिल्दैन,प्रदेश सरकारले पनि सरकारजस्तो बलियो खुटटा बनाएर अगाडि आउनुपर्छ,’ उनले भने,‘ द्रुत गतिमा यो बाटो बन्नुपर्छ, बनेन भने हामीले हिजो रिले अनसन गर्यो, म प्रदेशसभा अगाडि आमरण अनशन बस्ने जानकारी गराउँछु ।’

राष्ट्रिय गौरवको आयोजना हुलाकी राजमार्गको मोरङ खण्डमा ४४ किलोमिटर पर्छ । त्यसमध्ये हाटखोलादेखि रामचोकसम्म ६ किलोमिटर काम अतिसुस्त गतिमा छ । अन्य क्षेत्रको काम लगभग पूरा भएको छ ।

हुलाकी राजमार्ग निर्देशनालय, योजना कार्यालय इटहरीका अनुसार हुलाकी सडकको यो खण्ड श्रेष्ठ कन्ट्रक्सन कम्पनी प्राली काठमाडौंले २०७६ सालमा ७७ करोड रुपैयाँमा ठेक्का लागेको थियो । यो सडकको काम असारसम्म जम्मा २२ प्रतिशत मात्रै प्रगति छ । दुई वर्षमा निर्माण सम्पन्न गर्ने लक्ष्य रहेको सडकको पटकपटक म्याद थप भएको छ ।