उत्तर कोरियासँग ११–० ले हार्याे नेपाल

काठमाडौं । एएफसी यू– २० महिला एसियन कप छनोट खेलमा नेपाल उत्तर कोरियासँग ११–० गोल अन्तरले पराजित भएको छ । समूह ए को अन्तिम खेलमा नेपाल उत्तर कोरियासँग ११–० को पराकिलो अन्तरले पराजित भएको हो ।

भुटानको थिम्पुस्थित चाङलिमिथाङ स्टेडियममा आइतबार भएको खेलमा बलियो टिम उत्तर कोरियाले पहिलो हाफमा ५ र दोस्रो हाफमा ६ गोल गरेको थियो ।

समूहको सबै ३ खेल जितेको उत्तर कोरिया ९ अंक जोडेर समूह विजेता बन्दै अर्को वर्ष थाइल्याण्डमा हुने एएफसी यू– २० महिला एसियन कपमा छनोट भएको छ ।

उत्तर कोरिया साविक विजेता समेत हो । उत्तर कोरियाले छनोटमा कूल ३६ गोल गर्दा कुनै गोल बेहोरेन ।

छनोटमा नेपालको यो पहिलो हार हो । यो हारसँगै नेपालको छनोट हुने सम्भावना सकिएको छ । नेपालले पहिलो खेलमा भुटानसँग १–१ को बराबरी खेल्दा साउदी अरेबियासँग १–० ले विजयी भएको थियो ।