बानियाँले मंगलबार विश्वासको मत लिने, मतदान गर्न कांग्रेस एमालेकाे ह्वीप

काठमाडौं । बागमती प्रदेशका मुख्यमन्त्री इन्द्रबहादुर बानियाँले मंगलबार विश्वासको मत लिने भएका छन् । साउन २० गते उनी मुख्यमन्त्री नियुक्त भएका थिए ।

बानियाँलाई मतदान गर्न कांग्रेस र सत्ता साझेदार दल नेकपा एमालेले आफ्ना सांसदलाई ह्वीप लगाएको छ ।नेकपा एमाले बागमती प्रदेश संसदीय दलले मुख्यमन्त्री बानियाँले विश्वासको मत लिने प्रयोजनका लागि बोलाइएको प्रदेश सभा बैठकमा अनिवार्य उपस्थित भएर पक्षमा मत दिन ह्वीप लगाएको हो ।

नेपालको संविधानको धारा १६८ को उपधारा (४) तथा प्रदेश सभा नियमावली, २०७४ को नियम १४३ को उपनियम (१) बमोजिम विश्वासको मत लिने प्रयोजनका लागि मंगलबार प्रदेश सभा बैठक दिउँसो ४ बजेका लागि बोलाइएको छ ।

मुख्यमन्त्री बानियाँलाई विश्वासको मत दिन कांग्रेसले यसअघि नै ह्वीप जारी गरिसकेको थियो ।