रुखमा बाँधेकाे अवस्थामा शव फेला, चार जना पक्राउ

विराटनगर । झापामा गाउँलेले रुखमा बाँधेकाे अवस्थामा एक पुरुष मृत फेला परेका छन् । मंगलबार राति करिब साढे १० बजे झापा गाउँपालिका– १ लसुनामा आँपको रुखमा बाँधेका स्थानीय ६० वर्षीय जतन सोरेन बुधबार बिहान मृत अवस्थामा फेला परेका हुन् ।

अत्याधिक मदिरा सेवन गरेका सोरेनलाई मंगलबार राति स्थानीयले आँपको रुखमा बाँधेका थिए । बुधबार बिहान करिब ४ बजे उनी बाँधेकै अवस्थामा मृत फेला परेकाे  जिल्ला प्रहरी कार्यालय झापाका प्रवक्ता डिएसपी खगेन्द्रबहादुर खड्काले जानकारी दिए ।

प्रहरीका अनुसार राति छिमेकी महादेव टुडुको घर छेउ पुगेर काम्न थालेपछि महादेवसहित स्थानीयले  घर छेउमा रहेको आँपको रुखमा प्लाष्टिकको डोरीले बाँधेर छाडेका थिए । बुधबार बिहान करिब ४ बजे उठेर हेर्दा मृत भेटिएपछि प्रहरीलाई खबर गरेका थिए ।

घटनापछि प्रहरीले अनुसन्धानका लागि  मृतकको छोरा २७ वर्षीय अनतलाल सोरेन,  सोही स्थानका ५० वर्षीय महादेव टुडु, २० वर्षीय लुखिराम टुडु, २१ वर्षीय लखिराम टुडुलाई पक्राउ गरेको हो । अन्य फरार छन् । फरारको पनि खोजी भइरहेको प्रहरीले बताएको छ । पक्राउ परेकाहरुमाथि प्रहरीले ज्यान मुद्दा चलाउने तयारी गरेकाे छ ।