झापा,माेरङ र सुनसरीबाट २२ ट्रान्सफर्मर चोरी, १२ जना पक्राउ

विराटनगर । गत माघयता झपा, मोरङ र सुनसरीमा ट्रान्सफर्मर चोरी गर्ने गिरोहलाई प्रहरीले पक्राउ गरेको छ । गत माघ १५ गते यता मोरङमा ८ स्थान, सुनसरीमा १२ र झापामा २ वटा ट्रान्सफर्मर चोरी भएको थियो । यी चाेरीका घटनामा संलग्न भएकाे आराेपमा प्रहरीले १२ जनालाई पक्राउ गरेकाे हाे । पक्राउ पर्नेमा ७ जना चाेर र ५ जना चाेरीकाे सामान खरिद गर्नेहरु छन् ।

याे समूहले कृषि प्रयाेजन र एकान्त स्थानमा राखेकाे ट्रान्सफर्मर चाेरी गर्ने गरेकाे थियाे ।

काेशी प्रदेश प्रहरी कार्यालय विराटनगरले पत्रकार सम्मेलन गरी सार्वजनिक गरेकाे विवरण अनुसार मोरङकाे ग्रामथान गाउँपालिका– ४ का ४२ वर्षीय अर्जुनकुमार माझी (चौधरी), ग्रामथान– ५ का ३१ वर्षीय इरज धामी, सुनसरी दुहबी नगरपालिका– ३ का ३५ वर्षीय अनुज विश्वास (चौधरी), दुहबी नगरपालिका – २ का ३९ वर्षीय प्रयाग कुमार खाँ चौधरी, मोरङ बेलबारी नगरपालिका – ४ का २६ वर्षीय अर्जुन चौधरी बेलबारी– ३ का २७ वर्षीय रञ्जित तामाङ र देश भारत घर दुहबी नगरपालिका – ४ स्थित ससुराली घरमा बस्दै आएका ३४ वर्षीय आलम मिया चाेरीमा पक्राउ परेका छन् ।

चोरीको सामान भने विराटनगर महानगरपालिका– ३ का ५३ वर्षीय लक्ष्य प्रधान, मोरङ विराटनगर महानगरपालिका – ६ का ६२ वर्षीय कृष्णगोपाल ताम्राकार, सुनसरी दुहबी नगरपालिका– ३ का ३२ वर्षीय योगेश अग्रवाल, दुहबी २ का ३१ वर्षीय कपिल भट्ट, इटहरी उपमहानगरपालिका– ४ का ३९ वर्षीय सिताराम राईल पनि पक्राउ परेका छन् ।

यो गिरोहले २ करोड मूल्य बराबरका २२ वटा ट्रान्सफर्मर चोरी गरेको थियो ।

प्रहरीले चोरीमा प्रयोग भएका औजार डायल रेन्च  २२ थान, सलाई रेन्व ३ थान, पिलास ३ थान, पेचकस ३ थान, छिनो  १ थान, कैची १ थान, ह्याक्सो बिलेट ३ थानलगायत सामान बरामद गरेको छ ।

प्रहरीले चोरीमा प्रयोग भएको ६ वटा मोटरसाइकल पनि बरामद गरेको छ ।

यो गिरोहले गत माघ १५ गतेदेखि चोरी गर्दै आएको थियो । साउन ९ गते मोरङको रंगेली नगरपालिका– ९ इटाभट्टा टोलमा ट्रान्सफर्मर चोरी गर्न गएकाे समूहका ४२ वर्षीय अर्जुनकुमार थारु पक्राउ परेपछि प्रहरी गिरोहसम्म पुगेको थियो । ट्रान्सफर्मर चोरीको गिरोह खोज्नका लागि प्रदेश प्रहरी र जिल्ला प्रहरी कार्यालयबाट संयुक्त रुपमा टोली खटिएको थियो ।