कुलिङ पिरियड छानविन समितिमा सहमति, सभापति जिम्मेवार रहेको निष्कर्ष

काठमाडौं । संसदीय छानबिन विशेष समितिले संघीय निजामती सेवा विधेयकको कुलिङ पिरियड गडबडीमा राज्य व्यवस्था समितिका सभापति रामहरि खतिवडा जिम्मेवार रहेको निष्कर्षसहितको प्रतिवेदन तयार गरेको छ ।

संसदीय छानबिन विशेष समितिले खतिवडा नैतिक जिम्मेवार रहेको निष्कर्षसहितको प्रतिवेदन तयार पारेको हो ।

उच्च पदस्थ कर्मचारीको हकमा पद अनुकूल आचरण गरेको नदेखिएको पनि छानबिन समितिको निष्कर्ष छ ।

मुख्यसचिव र कर्मचारीहरुको हकमा पदीय र कानुनी जिम्मेवार हुने भएकाले सोही अनुसार जिम्मेवार हुने व्यहोरा प्रतिवेदनमा उल्लेख छ । नाम भने प्रतिवेदनमा किटान गरिएको छैन ।

आज बिहान चार बजे छानबिन प्रतिवेदन लेखन टुंग्याएर समितिले सर्वसम्मत पास गरेको समिति सदस्य एवम् नेकपा एमालेकी सांसद ईश्वरी घर्तीले बताइन् । आज बस्ने प्रतिनिधिसभा बैठकमा प्रतिवेदन पेश गरिनेछ ।